E selekshon di Liga Pabou Kòrsou a gana tambe su di sinku wega i a klasifiká invikto pa weganan di playoff dje kompetensia di Senior League Caribbean 2023. Den su ultimo wega dje buelta preliminar ela triunfá ku skor di 12 pa 6 riba Liga Pariba Kòrsou.
Un bon públiko awenochi, djaweps 29 di yüni, a bai pa mira e wega entre Liga Pabou i Liga Pariba. Esaki a tuma lugá den Tio Daou Ballpark na Noord Zapateer pa 7or.
E wega for di tempran a mustra di bai bira un bon wega ora ku niun dje timnan a logra skor den e promé dos inennan. Liga Pabou den di tres inen a pika 1-0 dilanti pa despues den di kuater inen amplia e skor ku 4 kareda mas pa tuma un ventaha kómodi di 5 pa 0.
Den su di sinku turno na bate Liga Pabou a skor 6 kareda pa yega skor di nòkout: 11-0. Liga Pariba sinembargo no a entregá i a skor 3 kareda den bòm dje mesun sinku inen pa asina keda na bida: 5-11.
Despues ku Liga Pabou a skor 1 kareda mas den di seis inen, Liga Pariba a bolbe menasá I logra skor atrobe 3 kareda: 6-12. Niun dje timnan no a skor den nan di shete turno na bate i e wega a tèrminá na fabor di Liga Pabou ku pues a finalisá e buelta preliminar invikto.
Aruba tambe a sigui ku su racha di viktoria ora ku awe mainta 9or ela hungá i triunfá ku skor di 11 pa 8 riba Repúblika Dominikana. E selekshon rubiano a sali skor 2 kareda den promé inen pa tuma ventaha di 2-0. E tim a mantene su ventaha te asta amplia esaki den lat.
Den e wega di tra’i mèrdia mitar di tres tabata e selekshon di Puerto Rico ku a sali viktorioso riba Boneiru: 11-9, E promé parti dje wega dado momento e tim for di Kralendijk a bai dilanti 4 pa 3, pero den di sinku inen Puerto Rico ku 3 kareda a bòltu e skor (6-4) i amplia esaki pa gana finalmente.
Kòrsou ku a kaba na promé puesto ku rekòrt invikto di 5-0 ta hunga mañan djabièrnè kontra di Puerto Rico ku a tèrmina na di kuater lugá ku 2 triunfo i tres derota. E wega aki ta kuminsá 7or di anochi den Tio Daou Ballpark.
Aruba a okupá e di dos puesto ku 4 viktoria i 1 derota i ta hunga mañan mitar di tres kontra di Liga Pariba Kòrsou ku a kaba ku 3 triunfo i 2 wega pèrdí na di tres puesto. E wega aki tambe ta den Tio Daou Ballpark. E ganadónan ta klasifiká pa final ku ta tuma luga djasabra.
Foto:Jacinto de jesus