E selekshon di beisbòl di Kòrsou a logra su di dos triunfo siguí den Juegos Centro Américano y del Caribe (CAC). Despues di a gana ayera di Venezuela ku skor di 4 pa 3, awe djarason 28 di yüni Kòrsou a laga Puerto Rico den tereno: 3 pa 2.
Kòrsou a kuminsá e kompetensia di beisbòl di CAC 2023 djasabra ganando dje pais anfitrión El Salvador ku skor di 12 pa 4. E sigiuente dia e tim a pèrdè di Cuba: 2-4.
Ayera Kòrsou den un wega bon bringá a gana di Venezuela ku ta un dje faboritonan. Tabata un enkuentro ku a desaroyá rapido i te ku di sinku inen no tabatin kareda. Den kabes dje di seis inen Kòrsou a skor 4 kareda pa bai ariba 4 pa 0, pero Venezuela den bòm di mesun 4 inen a hinka 3 kareda: 4-3. E skor no a kambia mas.
Den e wega di awe djarason Kòrsou a pika dilanti ku 1 kareda den di dos inen. Puerto Rico a skor 2 kareda den di tres inen pa bòltu e skor na su fabor: 2-1. Den di sinku inen Kòrsou a logra empatá e wega na 2 kareda pa finalmente den di shete inen skor e kareda di viktoria lagando Puerto Rico den tereno: 3-2.
E selekshon di Kòrsou ta hunga mañan djaweps 29 di yüni kontra di Nicaragua. Repúblika Dominikana riba djabièrnè ta e próksimo kontrinkante di Kòrsou. Djasabra ta hunga e weganan final.