E selekshon di Liga Pabou Kòrsou awenochi, djarason 28 di yüni, a gana su di kuater wega. E tim no a pèrdè ainda den e kompetensia di Senior League Caribbean 2023. E tim a logra un viktoria ku skor di 11 pa 7 riba Puerto Rico.
Puerto Rico a kuminsá e wega riba bon pia i asta tabata kómodo dilanti den komienso dje wega: 6-0. Pero Liga Pabou sinembargo no a entregá i a hinká e karedanan nesesario pa finalmente bai ariba i sigurá su di kuater viktoria sin derota.
Kontrali na Liga Pabou, Liga Pariba Kòrsou sí no a logra mantené su invikto. Porsierto ku tabata e seleskhon di Aruba ku a sutá e muchanan di Pariba ku skor di 13 pa 3. Despues di tabata pèrdí for di promé inen 0-1, e tim rubiano a skor 4 kareda den di tres inen i 3 den di kuater pa bòltu e skor: 7 pa 1.
Despues ku tantu Liga Pariba komo Aruba a skor 2 kareda den di sinku inen, kuater rubiano a logra krusa plato den bòm dje di seis inen pa asina sigurá e viktoria: 13-3.
Porsierto ku algun ora promé e selekshon di Aruba a gana tambe di Puerto ku skor di 6 pa 4. E produkshon di kareda rubiano tabata 2 den di dos inen, 1 den tantu di tres komo di kuater inen i 2 mas den di shete alabes ultimo inen. Puerto Rico a hinka 1 kareda den di dos inen, atrobe 1 den di seis i 2 kareda den di shete inen.
Finalmente e selekshon di Boneiru awe a logra su promé viktoria den e kompetensia di Senior League Caribbean. E tim a derotá Repúblika Dominikana ku skor pèrtá di 8 pa 7. Ku 3 kareda den di kuater inen Boneiru a logra empatá e wega na 7 pa finalmente skor e kareda di viktoria den di seis inen.
E kompetensia di Senior League Caribbean ta sigui mañan djaweps ku tres wega den Tio Daou Ballpark. E selekshon di Aruba ta hunga 9or di mainta kontra di Repúblika Dominikana. Mitar di tres Puerto Rico i Boneiru ta topa otro. Anochi 7or tin e konfrontashon entre Liga Pabou i Liga Pariba.
Picture:taken by Jacinto de Jesus
