E selekshonnan di Liga Pabou i Liga Pariba ta ketu bai invikto den e kompetensia Senior League Caribbean 2023. Tur dos tim representando Kòrsou a gana nan tres weganan. E dos timnan ta topa otro djaweps 29 di yüni den Tio Daou Ballpark.
Despues di dos dia dje kompetensia Senior League Caribbean 2023, ta obvio ku e timnan di Kòrsou ta esnan mas fuerte. Ambos selekshon a gana nan weganan te ku awor hopi fasil.
Liga Pariba Kòrsou awe mainta 9or den Cyborg Ballpark a gana di Boneiru ku skor di 21 pa 6 pa asina logra su di dos triunfo den e kampionato regional. E tim lokal a skor 2 kareda den promé inen i 12 den di dos pa pika dilanti 14-1. Ku 1 kareda den di tres inen i 6 mas den di kuater Liga Pariba a totalisá 21 kareda. Boneiru a skor 1 kareda den di dos inen, 3 den di tres i 2 den di kuater pa su 6 karedanan.
Den e otro wega ku tambe a kuminsá 9or den Tio Daou Ballpark e selekshon di Puerto Rico a gana ku skor di 19 pa 5 di Repúblika Dominikana.
Tra’i mèrdia mitar di 3 atrobe e selekshon di Liga Pariba a subi tereno di wega den Tio Daou Ballpark. E bia’ki tabata kontra di tim di Repúblika Dominikana. Ku 3 kareda den di promé inen i 2 den di dos e tim lokal a tuma ventaha komodo di 5 pa 0. Ku 2 kareda den di kuater inen, 1 den di seis i tambe shete inen Liga Pariba a gana ku skor di 9 pa 1. Repúblika Dominikana a skor su úniko kareda den di kuater inen.
Den e ultimo wega ku a tuma lugá 7or di anochi den Tio Daou Ballpark, e tim di Liga Pariba Kòrsou a gana ku skor di 16 pa 1 di Aruba. Ku 3 kareda den promé inen, mas 2 kareda den tantu di dos i tres inen. Pariba a bai 7-0 dilanti.
Aruba den bòm dje di tres inen a skor su úniko kareda dje wega. Liga Pariba den di kuater inen a sskor 9 kareda mas pa ampliá e skor na 16 pa 1 i asina tambe gana via di nòkout.
E kompetensia di Senior League Carribbean 2023 ta sigui mañan djarason atrobe ku kuater wega. Boneiru i Repúblika Dominikana for di 9or ta hunga den Cyborg Ballpark i na mesun ora Aruba i Puerto Rico ta topa otro den Tio Daou Ballpark. Pa 14.30 Aruba ta hunga kontra di Liga Pariba i 19.00 Liga Pariba ta bolbe subi tereno e bia’ki kontra Liga Pabou. E dos weganan aki tambe ta den Tio Daou Ballpark.
