E selekshon di Liga Pabou a kuminsá e kompetensia Senior League Caribbean 2023 awe djaluna 26 di yüni ku dos viktoria grandi. E tim a nòkout Boneiru promé 18 pa 0 i despues a derotá Repúblika Dominikana ku skor di 15 pa 3. Liga Pariba tambe a kuminsá e kampionato brabu ganando Puerto Rico 14 pa 5.
Kòrsou ta anfitrión dje kompetensia di Senior League Caribbean 2023. E weganan ta tuma lugá den Tio Daou Ballpark i Cyborg Ballpark na Noord Zapateer.
E selekshonnan ku a viaha bin Kòrsou pa kompetí den Senior League Caribbean 2023 ta Aruba, Boneiru, Republika Dominikana, Jamaica, Puerto Rico i US Virgin Islands (ku a kai afó). Kòrsou komo pais anfitrión ta partisipá ku dos selekshon: Liga Pabou i Liga Pariba,
E kompetensia a ranka sali awe mainta 9or ku Liga Pariba Kòrsou kontra di Puerto Rico. Esaki a tuma lugá den Tio Daou Ballpark. E tim lokal a gana ku skor 14-5. Por bisa ku 5 kareda den di tres inen Liga Pariba a sigurá e triunfo komo ku e orei ela yega 6 kareda. Kòrsou a skor 3 kareda mas den di kuater inen i 5 den di shete.
Den Cyborg Ballpark Boneiru a topa Aruba. E wega aki tambe kuminsá 9or di mainta. E tim rubiano a tene un fiesta di kareda ganando ku skor di 21 pa 2. For dje promé inen e selekshon di Aruba a habri e wega for di otro anotando 13 kareda. Ku 1 kareda den di dos inen i 7 den di tres e tim a seya e triunfo via di nòkout.
E di tres wega dje kompetensia tabata 14.30 den Cybrog Ballpark. E selekshon di Liga Pabou Kòrsou tampoko tabatin kompashon ku Boneiru: 18 pa 0. E karedanan tabata 3 den promé inen, 11 den di dos i 4 dem di tres inen pa asina totalisá 18. Umpire a kaba e wega despues di 4 inen pa via dje regla di nòkout.
E mesun selekshon di Liga Pabou a bolbe subi vèlt 19.00, e bia’ki den Tio Daou Ballpark. Esaki tabata kontra di tim di Repúblika Dominikana. Kòrsou mesora a skor 3 kareda den promé inen pa pika dilanti. A sigui 1 kareda den di 2 i tambe di tres inen. Ku 7 kareda den di kuater inen i 3 den di 5 Liga Pabou a yega 15 kareda, miétras ku Repúblika Dominikana tabatin 1 kareda den promé i 2 kareda den di kuater inen pa su 3 karedanan.
E kompetensia di Senior League Caribbean 2023 ta sigui mañan djamars 27 di yüni ku atrobe kuater wega. Puerto Rico i Repúblika Dominikana ta kuminsá 09.00 den Cyborg Ballpark, miéntras mesun 09.00 Boneiru ta sali kontra Liga Pariba Kòrsou den Tio Daou Ballpark. Pa 14.30 Liga Pariba Kòrsou ta topa Repúblika Dominikana den Tio Daou Ballpark i pa 19.00 tin e wega entre Liga Pabou Kòrsou kontra di Aruba den Tio Daou Ballpark.
