E selekshon di sòfbòl femenino di Kòrsou a sali awe, djadumingu 25 di yüni, pa Florida (Merka) pa konkluí su preparashon pa kompetí den Juegos Centro Américano y del Caribe (CAC) 2023. Despues di algun wega di fogeo, e tim na viaha pa El Salvador, kaminda e kompetensia di sòfbòl femenino ta ranka sali riba djadumingu 2 di yüni.
Promé ku subi avion awe djadumingu, e selekshon di sòfbòl femenino a bai misa di Suffisant djabièrnè. E tim a prepará fuerte ultimo lunanan pa su kompromiso na El Salvador i ta sera esaki ku algun wega di fogeo na Florida, Merka.
Kòrsou no tin selekshon di sòfbòl maskulino ta kompetí den CAC 2023 na El Salvador. E kompetensia aki sí a kuminsá ayera djasabra 24 di yüni ku e sigiuente resultadonan: Mexico a gana di Colombia ku skor di 10 pa 3. Despues dje viktoria ei e tim mariachi a sufri un derota kontra di Cuba: 2-6. Repúblika Dominikana a derota Centro Caribe Sports ku skor di 2-0, miéntras ku Venezuela a logra un viktoria di 7 pa 0 riba El Salvador.
Riba e di dos dia dje kompetensia di sòfbòl maskulino Cuba a triunfá riba Colombia ku skor di 2 pa 0. Repúblika Dominikana a gana ku skor di 8 pa 1 di Venezuela. Mexico tambe a logra derotá Venezuela ku skor di 12-11. Centro Caribe Sports a superá El Salvador ku skor di 7 pa 1.
