E selekshon di beisbòl di Kòrsou a sali gana ayera djasabra 24 di yüni su wega inisial den Juegos Centro Américano y del Caribe (CAC) kontra dje pais anfitrión El Salvador: 12-4. Riba e di dos dia di kompetensia awe djadumingu e tim lokal a pèrdè kontra di Cuba: 2-4.
Kòrsou ta un dje 35 paisnan ku ta kompetí den CAC 2023, di kua e apertura tabata djabièrnè 23 di yüni. Tin kompetensia den un total di 37 ramo di deporte.
Beisbòl ta un dje kompetensia ku a habri CAC 2023 ku ne ayera djasabra. E selekshon di Kòrsou a gana su promé wega ku skor di 12-4 di El Salvador. Mexico a superá Cuba ku skor di 4-0, Venezuela a derotá Puerto Rico ku skor pèrtá di 4-3 i Repúblika Dominikana a triunfá tambe ku skor pèrtá di 6-5 riba Nicaragua.
E kompetensia di beisbòl a sigui awe djadumingu ku Cuba propinando Kòrsou su promé derota ku skor di 4 pa 2. Venezuela a gana ku skor di 5-2 di Repúblika Dominikana, miéntras ku Nicaragua a logra un viktoria di 3-1 riba Puerto Rico. Falta resultado dje wega entre Mexico i El Salvador ku a kuminsá 10or di anochi awe djadumingu.
E próksimo kompromiso dje selekshon di Kòrsou ta mañan djaluna 26 di yüni. Esaki ta kontra dje tim di Mexico. E wega ta kuminsá 3or. Televishon Nos Pais ta transmití e weganan di Kòrsou.
