Marchena a titulá pa di tres biaha kampion den Little League dje tradishonal torneo Creme de la Creme. E tim a gana ku skor minimo di Tra’i Seru den final: 1-0. Den Minor League Friends Travel Team di Aruba a bira kampion ganando ku skor di 9-7 di Sta Maria.

Organisadó Rilando Chirino i patrosinadónan dje edishon di 2019 di Creme de la Creme por mira atrobe atras riba un eksitoso torneo. Esaki tabata dediká na Michelangelo ‘Lo’ Celestina ku ta mènedjer kampion di selekshon Little League Pabou.

Den Minor League e tim di Sta Maria a skor 2 kareda den di dos inen pa tuma ventaha di 2-0. Travel Team a bòltu e skor den su di tres turno anotando 5 kareda: 5-2. Sta Maria den bòm di mesun inen a skor 4 kareda pa bolbe pika dilanti: 6-5.

Ku 2 kareda den tantu di sinku i seis inen Friends Travel Team di Aruba a bini djatras pa finalmente gana e wega final ku skor di 9-7.

Den Little League e timnan di Tra’i Seru i Marchena a trit e publiko riba un tremendo espektakulo. Marchena a skor e úniko kareda dje wega den su di dos turno. Ku e triunfo aki Marchena a kleim e titulo di kampion pa di tres biana.