E weganan di selekshon den liganan hubenil di beisbòl a kuminsá ayera, djarason 15 di mei 2019, ku dos tremendo enkuentro den Post 6 Ballpark na Rio Canario. Liga Pabou a registrá viktoria den tantu Minor komo Little League.
E organisashon di beisbòl pa mucha a ranka sali ayera ku weganan di selekshon den Minor i Little League. Esaki ta pa determiná kua selekshonnan ta bai representá Kòrsou den kampionatonan regional próksimamente.
E promé wega den Post ^Ballpark tabata den Minor League i a bai entre Liga Pabou i Pariba. E hungadónan di Pabou a gana ku skor konvinsente di 9-0 di Pariba. Picher ganadó a resultá Timothy Mogen. E mihó bateadónan di Pabou tabata Isaac Acosta i Rigadon Raap. Tur dos a bati 1 hit den 1 turno na bate.
Pa Liga Pariba Ayden Calmes a resultá e picher pèrdèdó. E mes a sali tambe mihó bateadó huntu ku Urlyson Anastatia. Tur dos á dal 1 hit den tambe 1 turno na bate.
Den e di dos enkuentro e hóbennan di Liga Pabou i Pariba a trit e públiko riba un bunita espektakulo. Picher Curley Martha di Pabou a sobresalí tirando vários ponche i teniendo e bateadónan di Pariba riba 0 hit pa su tim gana ku skor di 1-0.
Porsierto ku tabatin un hit só den e wega di Little League. Esaki tabata di Jurdruk Profar di Liga Pabou. Ela dal 1 hit den 1 turno na bate.
Picher pèrdèdó a resultá Nathanael Cijntje ku tambe a tira un tremendo wega permitiendo solamente 1 kareda i 1 hit.
E weganan di selekshon ta sigui awe djaweps den Post 6 Ballpark na Rio Canario. Den Minor League (5or) Liga Willemstad ta hunga kontra Pabou i den Little League (7or) tambe.
