Xaverianen a gana e promé wega di final den divishon superior maskulino di Federashon Vòlibòl Kòrsou (Fevoko). Ela gana ayera, djarason 15 di mei 2019, den kuater sèt dje aktual kampion Watakeli Building Depot ku skor di 3-1.
Meskos ku e kompetensia regular i e serinan di semi final, e gran final tambe ta tuma lugá den sala Errol Rooi di Sentro Deportivo Kòrsou (SDK) na Brievengat. Porsierto ku e kampionato dje aña aki ta dediká na e baluarte Dito Ravenstein.
Watakeli a pasa pa final despues ku ela superá Titus den semi final, miéntras ku Xaverianen anteriormente a gana di Stakamahakchi.
Den e prome wega di final ayera, Watakeli a sali gana e promé sèt ku skor di 25-23. Xaverianen a empatá e wega ganando e di dos sèt tambe ku 25-23. E di tres sèt a bai tambe pa Xaverianen (25-21) ku a pika dilanti pa promé biaha den e wega. E tim a sigui den su bon momento ganando e di kuater sèt ku skor di 25-22 i asina kleim e promé triunfo den e seri final mihó di sinku wega.
E final den divishon superior maskulino ta sigui djadumingu awor. E wega aki ta kuminsá 5’or di atardi den sala Errol Rooi di SDK.
