Christine Dania a konkistá otro título. E kampion femenino di tènis di mesa e biaha aki a gana ayeranochi, djasabra 20 di yanüari, e sertamen di Reina di Karnaval 2018.
Fuera di ta un tòp deportista den e ramo di deporte pinpòn, Dania ta konosí tambe pa su partisipashon den sertamennan di beyesa i kultural. Porsierto ku e hóben di 24 aña aki ta éksitoso riba tur dos tereno.
Asina riba dia 24 di novèmber 2017 Dania a konkistá e título kampionil di pinpòn femenino di Kòrsou pa di dos aña konsekutivo. E hóben a pasa invikto pa final despues di a gana di respektivamente Jenny Cornelia (3-0: 11-5, 11-3 i 11-3), Gera Hernandez (3-0: 11-4, 11-4 i 11-4), Zachra Rademacker (3-0: 11-6, 11-7 i 11-1), Ronelly Vos (3-1: 11-1, 8-11, 11-3 i 11-1), Mary-Ann Mac Leod (3-0: 11-9, 11-7 i 12-10).
Den wega final ela bolbe topa e eksperensiá i veterano hungadó Mac Leod. E èks kampion di Kòrsou aki a sali gana e promé dos sètnan: 11-7 i 11-7. E tabata falta pues pa gana un sèt so mas pa konkistá e titulo kampionil. Dania sinembargo no a entregá i na su turno a gana e sigiuente tres sètnan (11-6, 11-3 i 11-7, pa asina prolongá su título di kampion femenino.
Fuera dje kompetensia di tènis di mesa, tambe Dania tabata éksitosamente aktivo den e sertamen di Miss Beauty World International kategoria Miss Petite ku a tuma lugá na Repúblika Dominikana. Porsierto ku dos aña pasá, na 2016, e hóben tòp deportista aki a gana tambe e korona di Reina di Seú di Kòrsou.
Ayera djasabra riba Kleine Werf den Skaló, Dania a konkistá pues otro título ora ku ela keda koroná Reina di Karnaval di Kòrsou 2018. E kampion di tènis di mesa pues awor ta bai guia Gran Marcha i Marcha di Despedida den kayanan di Sta Maria, Wishi, Marchena i Otrobanda.
Foto ‘cover’: Marcel Frans