Jong Holland a será e promé buelta den promé divishon di Federashon Futbòl di Kòrsou (FFK), esta Liga MCB, komo kampion invikto. E Trikolornan a gana awe, djadumingu 21 di yanüari 2018, tambe di Centro Dominguito pa asina kaba hopi komfortabel den kabes ku 25 punto for di 9 enkuentro.
E kampionato regular di FFK a kontinuá e wikènt aki ku atrobe un seri di 5 enkuentro. Manera ta kustumber tur a tuma lugá den stadion Dr Antoine Maduro na Kintjan.
Awe djadumingu tabatin e klèsh entre aktual kampion di Kòrsou Centro Dominguito i Jong Holland ku for di komienso a sali brabu i keda prestá na nivel. Despues ku e promé tempu a transkurí sin gol, e Trikolornan a habrí afó den di dos tempu ku 3 gol: 3-0.
Quinton Burk a skor pa Jong Holland den su di dos wega konsekutivo i a pone su tim dilanti 1-0. Esaki tabata na di 57 minüt. Randall Winklaar tambe no a keda’tras i na di 72 minüt di wega a pone e Trikolornan 2-0 dilanti. Na di 78 minüt Jurensley Martina a seyá e di 8 viktoria via di un pinalti.
Jong Holland a será e promé buelta ku 25 punto. Esaki tabata produkto di 8 viktoria i un empate. E tabla aki tabata kontra di Victory Boys: 0-0.
Den e otro wega awe djadumingu Inter Willemstad a gana di Union Deportivo Bándabou (Undeba): 2-1. Rudrick Pop a habrí e markador na di 47 minüt poniendo asina Willemstad dilanti, miéntras ku Christopher Isenia 10 minüt despues a empatá e wega. Sinembargo ku e enkuentro empatá 1-1, na di 76 minüt di wega Ruchino Kiriendongo a hinka gol kontra su mes ekipo dunando Inter Willemstad asina e viktoria.
Djasabra tambe tabatin dos wega den Liga MCB. Centro Social Deportivo Barber a gana di Jong Colombia: 2-0. Deannejive Willems na di 40 minüt i Marcelo Celestin na di 90 minüt a skor pa e tim di Barber.
E di dos enkeuntro djasabra a bai entre Victory Boys i Skèrpènè. E dos timnan di pariba a hasi koi ruman: 0-0.
Djabièrnè ‘Vriendschap Eendracht Sterken Tegen Alles’ (VESTA) tambe a gana di Hubentut Fortuna: 2-0. E golnan a keda anotá pa Jerachmeel Cleofa na di 11 minüt i Shurwendell Roosje na di 30 minüt di wega.
Jong Holland pues a sali kampion dje promé buelta den Liga MCB ku 25 punto. VESTA ta okupá e di dos puesto riba e tabla di posishon ku 16 punto for di 9 enkuentro. Inter Willemstad ta pasa kue terser puesto ku 15 punto, miéntras Undeba a kai na di 4 lugá ku 14 punto. Victory Boys i Skèrpènè ta kompartí e di 5 posishon rib’e tabla di posishon ku 12 punto. Centro Barber a subi bai okupá di 7 puesto ku 10 punto. Centro Dominguito, Jong Colombia i Hubentut Fortuna ta sigui ku respektivamente 9, 8 i 6 punto.