Wild Cats Guardian Group/KJ74 ta habri e di tres buelta den Liga Aqualectra ayeranochi, djaluna 11 di yüni 2018, ganando di Marchena Braves: 12-7. Ta e di 12 triunfo pa e kampion di Kòrsou, ku te ainda a pèrdè un enkuentro só.
Despues di a klousurá e di dos buelta den wikènt tras di lomba, Federashon Beisbòl di Kòrsou (Febeko) a sigui djaluna ku e promé wega dje di tres buelta. Esaki a tuma lugá den Stadion Johnny Vrutaal na Rif, Otrobanda.
Wild Cats a sali brabu den promé inen anotando 6 kareda. Marchena Braves den bòm di mesun entrada a skor 2 kareda: 2-6. Tur dos tim a hinka 1 kareda den nan sigiuente turno: 7-3 na fabor dje Pushinan Brabu.
E ekipo di Marchena den di kuater inen a bolbe krusá plato dos biaha i hasi e wega 5-7. Den su di seis turno na bate Braves a bolbe skor: 6-7. Despues ku Wild Cats durante 4 inen no a skor, e tim a eksplotá ku 5 kareda den di shete inen pa hasi e wega 12-6. Finalmente e enkuentro a tèrminá 12-7.
Picher ganadó a resultá Swenton Martina ku durante 5 inen a pèrmití 5 kareda di kua 3 tabata limpi i 9 hit. Mas aleu ela ponchá 5 bateadó i duna 2 base por bola. Ela keda relevá den di 6 entrada pa Sidney Antonia ku sinembargo no tabatin su mihó anochi. Den 1,2 inen e relevista a pèrmití 2 kareda i 3 hit i a keda remplasá pa Kennimar Martina ku via di ponche a salbá e enkuentro pa Wild Cats.
Alex Henrietta, Rojean Cleofa, Terrence Goeloe, Yurendell de Caster i Ardley Jansen a destaká na bate pa Wild Cats. Henrietta a bati 3 hit den 4 turno i empuhá 1 kareda. Cleofa tabata bon pa tambe 3 hit pero den 5 turno i e tambe a empuhá 1 kareda. Goeloe a dal 2 hit den 4 turno i sòru pa 3 kareda. De Caster tambe a empuhá 3 kareda ku 2 hit den 4 turno di kua 1 homerun. Jansen a bati 2 hit den 4 turno i empuhá 1 kareda.
E kampionato di beisbòl dòbel A, Liga Aqualectra, ta sigui awenochi den Tio Daou Ballpark. E enkuentro aki ta entre Royal Scorpions Mr Baseball My Malls i Sta Rosa Indians i ta kuminsá mitar di 8.