Jong Holland i Jong Colombia a gana nan di dos wega den Kaya 6 di Liga MCB promé divishon di respektivamente Inter Willemstad i Centro Dominguito. Nan ta kompartí komodamente e promé lugá ku 6 punto. Centro Barber den su di dos kompromiso atrobe a empatá, e biaha’ki kontra Skèrpènè: 1-1.
E kompetensia den Kaya 6 di Liga MCB promé divishon a sigui ku 3 wega den wikènt. E weganan aki a tuma lugá den Stadion Rignaal ‘Jean’ Francisca den Brievengat.
E promé enkuentro tabata djaweps. Jong Holland a gana ku skor di 2-0 di Inter Willemstad. Kentz Suly na di 27 minüt a hinka e promé gol p’e tim Trikolor, miéntras ku faltando 3 minüt promé ku wega kaba Jurensley Martina a skor e di dos gol.
Jong Colombia djabiérnè a seya for dje promé tempu su di dos triunfo den Kaya 6. Esaki tabata riba Centro Dominguito. Jervine Mook na di 30 minüt a hinka e úniko gol dje wega pa e tim Saminero.
Finalmente ayera djasabra e wega entre Centro Barber i Skèrpènè a tèrminá 1-1. Na apenas di 4 minüt Remsley Boelijn a skor pa e tim di pariba. Darlyson Ellensburg na di 68 minüt a empatá e wega pa Centro Barber.
E kompetensia den Kaya 6 ta sigui djarason 14 di sèptèmber. Centro Dominguito ta hunga kontra Centro Barber. Anto djaweps Jong Colombia i Jong Holland ta topa otro. Tur dos wega ta kuminsá 8or den Stadion Rignaal ‘Jean’ Francisca.
Foto: Jacinto de Jesus