Shuatanari den divishon máksimo femenino a gana su promé wega den kampionato regular nobo di vòlibòl. Ela gana ku skor di 3-1 di Stakamahakchi. Den divishon máksimo maskulino Xaverianen a triunfá ku 3-0 riba Watakeli.
E direktiva nobo di Federashon Vòlibòl Kòrsou (FeVoKo) despues di un di dos aña pa motibu dje pandemia di Covid-19, a bolbe organisá e kampionato lokal. E apertura a tuma lugá ayera djadumingu 11 di sèptèmber den sala Errol Rooi di Sentro Deportivo Kòrsou (SDK) na Brievengat.
Un bon publika a haña kaminda pa e sala kubrí di SDK pa disfrutá dje apertura dje kampionato. E sake ofisial tabata na enkargo di minister Sithree van Heydoorn di Deporte. Despues tabatin dos wega den divishon máksimo.
Den klase femenino Shuatanari ta pika dilanti ganando e promé sèt 25 pa 7 di Stakamahakchi, ku sinembargo ta gana e di dos sèt 25 pa 21. Esei tabata tambe tur kos pa Stakamahakchi, pasobra Shuatanari a gana tantu e di tres komo e di kuater sèt ku respektivamente 25-13 i 26-24.
Den klase maskulino Xaverianen no a laga niun duda kua tim ta mas fuerte, aunke ku e bataya tabata hopi bringá. Ela superá Watakeli ku skornan pèrtá di 27-25, 26-24 i 25-21
Fotonan: Jacinto de Jesus