Sport.cw

Sponsored by

Sponsored by

Sponsored by

Otro wikènt yen di gol

E kampionato di futbòl den promé divishon di Federashon Futbòl Kòrsou (FFK), esta den Liga MCB, a konosé otro wikènt yená ku gol: 17. Victory Boys, Jong Holland i Vriendschap Eendracht Sterken Tegen Alles (VESTA) a tuma 14 na nan enkargo.

E kompetensia di futbòl manera kustumber a kontinuá djabièrnè anochi den Stadion Antoine Maduro, esta stadion di SUBT na Kintjan. Tabatin wega tambe djasabra i awe djadumingu, 25 di febrüari 2018.

Jong Holland ta sigui invikto den Liga MCB. E tim Trikolor awe djadumingu a bolbe ganá di Jong Colombia: 3-0. Jurensley Martina a skor tur e golnan: na di 12 minüt, 55 i 65 minüt.

Den e otro wega di awe djadumingu Skèrpènè a dal Centro Social Deportivo Barber ku skor di 2-1. Jermaine Spencer a pone e ekipo na di 16 minüt dilanti, miéntras ku Sebastian Canobra na di 72 minüt a seyá e viktoria. E gol di Centro Barber a keda anotá pa Nigel Valorian na 46 minüt.

Djasabra VESTA a superá Hubentut Fortuna ku skor di 3-1. Harol Vargas, Jursley Kroonstadt i Shurwendell Roosje a anotá pa e tim di Buena Vista i besindario, miéntras ku Luis Fruto Mirando tabata eksitoso pa e ekipo di Seru Fortuna.

Den e otro enkuentro djasabra Victory Boys a goliá Inter Willemstad ku skor di 4-0. Jonathan Libiana a sòru pa mitar dje produkshon di gol, miéntras ku Sharrion Pietersz i Raylison Lindo a hinka kada un 1 gol.

Roba djabièrnè Union Deportivo Bándabou a pèrdè ku 1-2 di Centro Dominguito. Samuel Matheus a tuma e dos golnan di Centro Dominguito na su enkargo, miéntras ku Lendell Johannes a salba e honor pa Undeba.

 

 

Translate »