Stakamahakchi a sigui invikto ayera, djadumingu 18 di febrüari 2018, den klase superior femenino di vòlibòl. E ekipo aki a derotá Green Jewels ku skor di 3-0. Den maskulino tambe Stakamahakchi a gana, ora ku di forma dramátiko e ekipo a bini djatras pa triunfá riba Watakeli: 3-2.
Federashon Vòlibòl di Kòrsou (FeVoKo) despues di dianan di fiesta karnavalesko, a kontinuá ku su kampionato regular. Tabatin 4 enkuentro den sala kubrí Errol Rooi di Sentro Deportivo Kòrsou (SDK) na Brievengat.
Den klase superior femenino Stakamahakchi a logra su di 7 triunfo konsekutivo. E ekipo a gana ku skor di 3-0 di Green Jewels. Aunke ku e skor no ta ilustrá esei, pero e tim pèrdèdo a duna bon bataya, pero e kabesantenan dje liga sin su harmadó regular tòg e sali viktorioso: 25-18,25-21 i 25-14.
E di dos wega den klase superior femenino a terminá den un triunfo pa Shuatanari Lab de Med riba Watakeli Nagico: 3-0. Aki tambe a enkuentro a keda duru bringá pa e ekipo pèrdèdó. E skor dje sètnan tabata 25-22, 25-13 i 25-21 na fabor di Shuatanari.
Stakamahakchi ta na promé lugá riba e tabla di posishon ku 7 triunfo sin derota. Shuatanari ta subi bai okupá di dos puesto huntu ku Hurricane, tur dos ku 3 viktoria i 3 wega pèrdí. Watakeli ta kai na di 4 posishon ku 3 wega ganá i 4 pèrdí. Green Jewels den 6 enkuento ainda no a saboriá viktoria
Den klase superior maskulino Stakamahakchi a skapa di chiripa. Watakeli a sali brabu bai 2-0 dilanti. E tim sinembargo no a logra fusilá e kontrinkante i finalmente a pèrdè 2-3. E skor dje sètnan ta: 26-24, 25-19, 19-25, 18-25 i 10-15 pa Stakamahakchi.
Den e otro enkuentro den klase superior maskulino Xaverianen a sali viktorioso riba Green Tigers: 3-1. E skor dje sètnan tabata 25-23, 25-21, 19-25 i 25-18.
Xaverianen a pasa pa komandá su so e tabla di posishon ku 6 viktoria i 2 derota. Watakeli ta kai na di dos lugá ku 5 wega ganá i 3 pèrdí. Stakamahakchi ta sigui na di tres puesto ku 4 triunfo i 3 wega pèrdí, mientras ku Green Tigers den 7 wega no a gana ainda.
