Liga Pabou Little a ranka sali brabu den e kompetensia di Little League Caribbean 2023 na Puerto Rico. E tim a gana su dos weganan ku ela hunga awe, djamars 11 di yüli, di forma konvinsente. Aruba a kai promé ku skor di 11 pa 0 i despues Yabucoa Puerto Rico a haña 10 pa 0.
Despues di a viaha djadumingu tras di lomba pa Puerto Rico, Liga Pabou di Kòrsou a debutá awe ku dos viktoria aplastante. E tim a skor un total di 21 kareda den e dos weganan.
Liga Pabou mañan ta bolbe topa e mesun dos timnan, esta Aruba I Yabucoa Puerto Rico. Komo pais anfitrión Puerto Rico ta kompetí ku dos tim. Ta hunga den dos pul. E kompetensia ta dura te ku djasabra 15 di yüli.
E tim u titulá kampion dje kompetensia na Puerto Rico ta representá region di Karibe den Little League World Series na Williamsport, Merka. E kampionato mundial aki ta planiá pa tuma lugá di 16 pa 27 di ougùstùs dje aña’ki.
Fanatikonan di beisbòl por sigui e prestashon di Liga Pabou via di Deporte Aktivo Live i Radio Hoyer. Sport.cw ta gustosamente ta kompartí e live streaming dje dos medianan aki.