Liga Pabou ayera, djarason 12 di yüli, atrobe a gana su dos weganan den e kompetensia di Little League Caribbean 2023 na Puerto Rico. E tim di Kòrsou den su promé wega a gana Aruba ku skor di 6 pa 3, miéntras ku despues Yabucoa Puerto Rico a bolbe haña otro palisa: 11 pa 1.
Den kuater wega Liga Pabou a skor pues 38 kareda i haña solamente 4 kareda kontra. E tim a pasa invikto pa e sigiuente buelta.
Kontra di Aruba Liga Pabou a sali skor 3 kareda den promé inen. E tim a skor 1 kareda mas den su di tres turno, di sinku i seis inen pa asina totaliá 6 kareda. Aruba ku pues a kai atras for di tempran, a hinka 1 kareda den di dos, kuater i di sinku inen.
Den e di dos wega tambe Liga Pabou for dje promé inen a piká dilanti: 1 pa 0. E tim a skor 2 kareda mas den di dos inen pa ampliá e ventaha na 3 pa 0. Puerto a hinka 1 kareda den di sinku inen, pero den bòm dje mesun inen Liga Pabou a skor 8 kareda pa asina nòkout e tim di Yabucoa ku skor di 11 pa 1.
Fanatikonan di beisbòl por sigui e prestashon di Liga Pabou via di Deporte Aktivo Live i Radio Hoyer. Sport.cw gustosamente ta kompartí e live streaming dje dos medianan aki.