Pichingolo Nissan ta un viktoria for di prolongashon di su titulo kampionil den sòfbòl fast pitch femenino superior. E tim kampion a superá Souax Gill’s Sport dos biaha i ta 2-0 dilanti den final di Liga MCB-CSB.
Direktiva di Curaçaose Softball Bond (CSB) djabièrnè a ranka sali ku e final i a sigui ayera ku e di dos wega. Tur dos a tuma lugá den Sam Bunting Ballpark den Brievengat.
E final ta konsistí di un seri mihó di 5 wega. Esaki ta nifiká ku e tim ku registrá 3 triunfo, ta kampion di Kòrsou.
De e promé wega Julise Koffie a sobresalí pa Pichingolo. Ela kuminsá riba montíkulo i a logra tene Souax na 3 kareda pa asina sali e picher ganadó. Komo batiadó ela dal 2 hit den 4 turno (4-2) i ku esakinan ela empuhá 2 kareda tambe. Su kolega Anias Piar tambe a bati di 4-2. E sifranan final pa Pichingolo: 5 kareda, 6 hit i 1 eror.
Picher Tafari Janga a sufri e derota pa Souax, miéntras ku tantu Myah Thompson komo Tanusi Delando a bati 2 hit den 4 turno. Un dje hitnan di Delando tabata un homerun. Souax a kaba ku 3 kareda, 7 hit i 4 eror.
E di dos wega tambe Pichingolo tabata produktivo na bate i a gana ku skor di 5 pa 1. Picher ganadó tabata Arnalda Margaritha ku a haña bon sosten di su koleganan den defensa. Thaima Maximiliana a sali mihó batiadó ku 2 hit den 3 turno. Pichingolo a kaba ku 5 kareda, 9 hit i 0 eror.
Souax a skor 1 kareda riba apenas 3 hit. Picher J’Dah Girigorie a pèrdè e wega. Jeannevian Kinburn a sobresalí na bate ku 1 hit den 1 turno.
Ku e dos triunfonan ei awor Pichingolo Nissan mester di un viktoria só mas riba Souax Gill’s Sport pa prolongá su titulo kampionil. E di tres wega di final ta mañan, djaluna 22 di novèmber. Esaki ta kuminsá mitar di 8 anochi den Sam Bunting Ballpark.
