Inter Willemstad a sigui goloso den Kaya 6 den promé divishon di futbòl. E tim di Vredenberg i bisendario a goliá su ruman grandi SUBT di Kinchán ku skor di 6-0. Victory Boys a sorprendé kampion Skèrpènè ku 4-1, miéntras Jong Holland i FC Sithoc a parti punto: 0-0.
Federashon Futbòl Kòrsou (FFK) a sigui djabièrnè ku e kompetensia den Kaya 6. Atrobe tabatin 3 wega ku a hungá na mesun ora, esta 8or di anochi, den Stadion Dr. Antoine Maduro, Stadion Ergilio Hato i stadion di FFK.
E wega entre Jong Holland i FC Sithoc den stadion di FFK den Brievengat, a kaba manera ela kuminsá: 0-0. Esaki ta nifiká ku e trikolornan di Jong Holland ainda ta invikto den dos wega, miéntras ku e kolegialnan di Sithoc a haña nan promé punto den Kaya 6.
Den Stadion Dr Antoine Maduro na Kinchán Victory Boys a logra su promé triunfó, despues di a pèrdè su promé wega. E tim di Pariba a goliá Skèrpènè ku skor di 4 pa 1.
E hungadó Stalin Lopez Rodriguez na di 20 minüt a pone Victory Boys 1-0 dilanti. Na di 48 minüt atrobe e tabata éksitoso: 2-0. Na di 74 minüt Gerien Silva a hasi e wega 3 pa 0. Faltando 9 minüt pa wega kaba, Skèrpènè ta hinka gol den su mes gol. Finalmente den tempu di suspenshon, esta 90+ minüt, Christopher Isenia ta salba honor pa e tim di fraternan.
Esei tabata e promé viktoria pa Victory Boys den Kaya 6, miéntras ku Skèrpènè a sufri su promé derota. Tur dos tim tin awor 3 punto for di 4 wega.
Inter Willemstad a sigui produsí gol den su di dos wega den Kaya 6, ganando ku skor di 6 pa 0 di SUBT. Ruensley Leuteria a hinka dos gol na di 38 i 51 minüt. Davidson Rosa na di 45+ minüt tambe a skor. Mas
aleu Rudrick Pop na di 50 minüt a amplia e skor mas aun. Stallone Isenia na di 65 minüt i Shakir Amerikaan na di 83 minüt a kaba ku e goliada.
Ku su di dos viktoria awor Inter Willemstad tin 6 punto den dos wega i ta okupá su só e promé lugá den Kaya 6 di Liga MCB. E tim di Vredenberg den dos wega a hinká 10 gol.
