Pichingolo Kia/Nissan falta un triunfo pa konkistá e titulo kampionil di sòfbòl femenino dòbel A. E tim a gana tambe e di dos wega dje seri final di The Fighting Team: 11-4.
Curaçaose Softball Bond (CSB) a programá e di dos wega dje final tambe den Sabana Ballpark di Richard ‘Chati’ Constancia. E promé wega ku tabata djabièrnè a sali 5-1 na fabor di Pichingolo.
Ayeranochi tambe Pichingolo a ligá bon na bate ku 13 hit, entre nan un homerun foi stadion di Emily Jonis. Picher ganadó tabata atrobe Shana Te Vrede ku a drenta di relevo pa picher habridó Arnalda Margaritha. E mihó batiadó tabata Emily Jonis ku a bati 3 hit den 4 turno ku 1 homerun.
Picher Ruthsainy Calmera a pèrdè e wega pa The Fighting Team, miéntras ku e mes huntu ku Sovienca Calmera i Sharon-Rose Delanooi kada un a bati 2 hit den 3 turno. Por sierto ku Sharon-Rose Delanooi tambe a dal un homerun.
Awor The Fighting Team tin dos derota sin viktoria den e final i pues ta lomba kontra muraya. E seri ta mihó di sinku wega i pues pa keda ku chèns e tim tin ku gana djabièrnè 27 di sèptèmber. E wega aki tambe ta tuma lugá den Sabana Ballpark i ta kuminsá 8or di anochi.
Mañan djaluna 23 di sèptèmber CSB ta ranka sali ku e
weganan di promoshon i degradashon. E seri mihó di sinku wega aki ta bai entre
Nos
Tei Curaçao Office Supply i Vipers Elite. Nos Tei Curaçao Office Supply a
terminá e kampionato regular di dòbel A na último lugá, miéntras ku Vipers
Elite a sali kampion di klase A. E promé wega ta kuminsá 8or den Sabana
Ballpark.