Pichingolo Nissa tabatin un bon wikènt. E kampion di Kòrsou a gana su dos weganan den kontinuashon dje kampionato femenino di sòfbòl fast pitch. Esaki ta kontrali na The Fighting Team ku a pèrdè su dos kompromisonan.

E direktiva di Curaçaose Softball Bond (CSB) predisí pa Edward ‘Chu’ Martis a sigui den wikènt ku e kampionato den divishon superior. E kompetensia ta den ful swing.

Asina Julise Koffi a sobresalí pa Pichingolo Nissan. Ela tarea pa pichá i a logra dominá e fuerte ekipo di The Fighting Team pa guia e tim kampion di Kòrsou na un triunfo ku skor minimo: 1-0.

Pichingolo Nissan tababin 1 kareda riba 5 hit I e tim no a komere niun fayo den defensa. Di mes picher ganadó tabata Julise Koffy i mihó batiadónan tabata Rigmayra Poulina i Geneviëve Hariquez. Tur dos a bati 1 hit den 2 turno (2-1).

Den otro bon wega e picher J’Dah Girigorie di Souax Gill’s Sport durante 7 inen tampoko a laga Fenix Softex krusa plato. Ela guia su tim na un viktoria di 6 pa 0, permitiendo solamente 1 hit.

Souax a kaba ku 6 kareda riba 9 hit I 2 eror ku J’Dah Girigorie ganando e wega komo picher i mihó batiadó Myah Thompson ku tabatin 3 hit den 4 turno (4-3).

Fenix Softex a tèrminá ku 0 kareda, solamente 1 hit i 1 eror. Picher pèrdèdó tabata Thisainy Statie, miéntras ku mihó batiadó tabata Almarisca Hooi ku 1 hit den 3 turno (3-1).

Fenix Softex den su di dos wega a probechá ku The Fighting Team ainda tabata grògi dje derota anterior. Picher Yetsely Helmijr a dominá tur e batiadónan peligroso dje tim kontrali pa asina su tim Fenix gana ku skor di 3 pa 1.

Fenix Softex tabatin 3 kareda, riba tambe 3 hit i e tim no a komete eror den su defensa. Picher Yetsely Helmijr a gana i mihó batiadó tabata Almarisca Hooi ku a kaba ku 3-1: 1 hit den 3 turno.

The Fighting Team tabatin 1 kareda riba tambe 3 hit, miéntras ku e tim a kometé 1 eror. Picher pèrdèdó a resultá Ruth-shainny Calmera i esun ku mihó bate tabata e mes ku 1 hit den 1 turno (1-1)

Finalmente Pichingolo Nissan a gana tambe di Souax Gill’s Sport ku skor pèrtá di 4 pa 3. Pichingolo tabatin 4 kareda, 4 hit i 0 eror. Arnalda Margaritha tabata picher ganadó, mihó batiadó tabata Arjenette Wernet Bernardus ku a bai di 2-1. Souax a skor 3 kareda riba 7 hit, pero a komete 6 eror. Picher pèrdèdó tabata Tafary Janga I e hungadó ku mihó bate tabata Kimberley Agard ku a bati 2 hit den 3 turno (3-2).