E organisashon di sòfbòl Pichingolo no ta kontentu ku su talentoso hungadó Thaíma Maximiliana atrobe no ta nominá pa e premio di deportista hubenil femenino di 2023. Sekretario Fenton Thomasita dje tim 41 biaha kampion di Kòrsou, ta konsiderá esaki komo un inhustisia grandi kontra e sòfbolista di dieskuater aña.
Despues di a bira konosí ku Thaíma Maximiliana pa di tres aña konsekutivo no ta nominá, Fenton Thomasita a manda un karta enbano pa e komishon di FDOK enkargá ku e nominashonnan. Por sierto ku e federashon aki a anunsiá resientemente ku durante un anochi gala riba 24 di aprel próksimo ta anunsiá ken ta e mihó depòrtistanan di Kòrsou di aña 2023.
“Pa tres aña largu no ta rekonosé den su propio pais, mientras ku skolnan Merikano ta pará den rei pa Maximiliana. Di mes tambe ela a risibí un scolarship i ta bai Merka e aña’ki mes pa asina por sigui su estudio i tambe ku práktika dje deporte di sòfbòl”, Thomasita a deklará.
E sekretario di Pichingolo ta kritiká e manera di traha dje komishon di FDOK enkargá ku e selekshon dje nominadonan. E sa di kiko e ta papia, pasobra den pasado resien e tabata forma parti dje mesun komishon aki. Hunto ku un otro miembro ela sali for di esaki. Tabata promé ku e pandemia di Covid-19. E dos miembronan for dje tempu ei no tabata di akuerdo ku e manera di selekshoná e nominadonan.
“E komishon tabata enfoká únikamente riba e inskripshonnan di federashonnan di deporte. Sinembargo, no tur federashon ta manda nan kandidatonan aden. Pues ami tabata haña ku nos komo miembronan di komishon tambe por a aktua proaktivamente i nos mes proponé deportistanan sobresaliente pa eventual nominashon”, Thomasita ta sigui kontá.
Referiendo na e echo ku Maximiliana atrobe no ta nominá, e dirigente di Pichingolo a bisa ku e komishon di FDOK ni sikiera pa desensia a kontestá su karta tokante esaki. “E hóben a hunga un ròl prominente den e kompetensia lokal di sòfbòl pa Pichingolo den dòbel A, pero tambe den klase A i hubenil. Meskos tambe e tabatin bon prestashon den e selekshon di sòfbòl di Kòrsou kontra di pichernan di otro paisnan i tambe komo shortstop.”
Mas aleu Thomasita a deklará e sigiuente: “Esaki ta un inhustisia grandi kontra un hóben humilde i hopi talentoso ku shete dia pa siman ta praktiká su deportenan favorito ku hopi plaser i dedikashon. E situashon aki ta kousa hopi tristesa i desilushon. Promé ku tur otro na e hóben mes, su famia i tambe e organisashon di Pichingolo.”
Además dje deporte di sòfbòl, Maximiliana tambe ta praktiká fútbol femenino i atletismo na un nivel haltu. Asta e ta den e selekshon nashonal di e dos ramonan di deporte akí. Por sierto ku ela representa Kòrsou resientemente na e kompetenshanan di atlétismo di Kariba, esta Carifta Athtetics 2024 na Grenada. Ela keda na di sinku lugá den e kompetensia di tira speer.