Pichongolo Nissan a bolbe bira kampion di sòfbòl femenino dòbel A. Picher Julise Koffie tabata e faktor determinante den prolongashon dje titulo akí. Ela tira un ‘one hitter’ ayera djasabra 11 di novèmber riba Sta Rosa Angels Vanddis pa su tim gana 5 pa 0.
Direktiva di Curaçaose Softbal Bond (CSB) por mira’tras riba un bon kampionato i tambe un final elektrisante dje kompetensia femenino fast pitch. Un publiko grandi a sigui e weganan den Sam Bunting Ballpark i Sabana Ballpark.
Tantu e serinan pre final i e gran final tabatin un desaroyo pekuliar, kaminda Sta Rosa Angels a presentá ku un tim ahustá. Despues di a tèrminá e kompetensia regular na di 4 puesto, Sta Rosa a elemina primeramente Souax Sports Gill i despues Fenix pa klasifiká pa e gran final.
Den su promé wega di final Sta Rosa Angels ta derotá Pichingolo sorprendentemente: 5 pa 4. E kampion di Kòrsou den di dos wega a empatá e seri ganando fasil ku skor di 8 pa 0.
E di tres wega a resultá den un tremendo duelo di picheo entre Xanne Zwakman i Julise Koffy. Sta Rosa a gana esaki ku skor minimo: 1 pa 0. Asina e tim di Pariba a tuma ventaha d- 2-1 den final.
Pichingolo den e di kuater wega a bolbe demonstrá dikón e ta e eterno kampion, ganando ku skor di 5 pa 1. Asina e tim kampion a forsá e di sinku wega, alabes esun desisivo dje seri.
Ayera djasabra den atrobe un Sabana Ballpark yen di fanátiko Pichingolo for di tempran a pika dilanti. E tim no a entregá su ventaha i asta a ampliá esaki pa gana ku skor di 5 pa 0.
Picher Julise Koffie sin duda tabata e motor tras dje konkista dje tantisimo titulo kampionil pa Pichingolo. E tabatin un aktuashon sobresaliente den tur e sinku weganan den final tantu riba montíkulo komo den kaha di bateo.
Por sierto Julise Koffy ayera djasabra a pèrmití solamente 1 hit na Sta Rosa Angels. E mes a resultá tambe e mihó batiadó pa Pichingolo ku 1 hit den 1 turno. Den tur e weganan ela dal hit. Ela gana meresidamente e premio di hungadó mas balioso dje gran final den Liga CSB-MCB den sòfbòl femenino dòbel A.
Pictures: Edsel Sambo
