Sport.cw

Sponsored by

Sponsored by

Sponsored by

Pichingolo serka minister

Minister di Enseñansa, Siensia, Kultura i Deporte Sithree van Heydoorn djamars atardi a risibí Pichingolo Nissan. E tim kampeon di Kòrsou di sòfbòl femenino fastpitch a bishitá e mandatario na su despacho den edifisio di World Trade Center (WTC).

Ta di dos aña konsekutivo ku hungadónan i dirigentenan di Pichingolo ta serka minister Van Heydoorn. Esaki ta pa nan risibí un distinshon di parti di gobièrnu.

Huntu ku e minister di deporte tabata presente Lizette Sambo-Velder, direktor di sektor di Kultura i Deporte. Tambe tabatei Amado Victoria ku ta konsulente deportivo di e ofisina di kultura i deporte i Errold Bishop ku ta kolaborador di minister Van Heydoorn.

Van Heydoorn a felisitá Pichingolo ku otro título di kampeon. Ela a pidi e sòftbolistanan i dirigentenan pa sigui hasi nan esfuerso pa mantené e tim i sòfbòl na laria.

Mas aleu Van Heydoorn a konta ku dia ku tabatin e problema pa hunga final debí na áwaseru i ku beisbòl i sòfbòl mester a hunga riba e mesun dia. Ela kombersá ku Fenton Tomasita dirigente di Pichingolo i puntra kon bin no ta hunga wega di kampeonato di sòfbòl na e parke na Buena Vista. E miembro di direktiva di Pichingolo a splika ku e lusnan ta poko defisiente, i tambe tereno rondó dje parke ta habri.

Van Heydoorn a bisa ku ta su deseo pa yuda sigur e deportenan ku ta saka kara mas di Kòrsou pa nan tin bon instalashon. E ta haña ku por tin ounke ta tres parke ku por hunga wega di kampeonato riba dje. Esei mes a pone ku e ta bai pèrkurá pa parke di Pichingolo na Buena Vista haña e iluminashon adekuá pa por hunga wega anochi sin problema.

Tambe e mandatario a rekonosé durante e bishita di Pichingolo ku Sabana Ballpark lo haña yerba artifisial i lo perkurá tambe pa e ta sera. E mandatario no a skonde su preokupashon ku tin biaha kosnan di gobièrnu ta tarda poko, pero ku nan lo hasi lo máksimo pa sigurá ku mei mei di 2023 tur kos ta kla o sigur riba e bon kaminda.

Lizette Sambo-Velder tambe a hiba palabra, e la elogiá balanse ku e la nota den Pichingolo ku tin sòftbolistanan hóben, i tambe poko mas veterano. Amado Victoria a urgi nan pa sigui traha duru i ku ánimo pa engrandesé deporte. Errold Bishop a rekonosé e hazaña inkreibel di e organisashon di Buena Vista ku a logra nan di 40 título di kampeon di Kòrsou.

 “Ta un rekòrt inkreibel ku ni mi ñetunan lo no mira kibrá,” Bisshop a deklará. Taffy de Jongh na nòmber dje organisashon di Pichingolo a gradisí e titular di deporte i su hendenan pa e invitashon. Na su turno ela bisa ku ta un honor pa kualke deportista di por ta di bishita serka e minister. Pichingolo ta selebrá 50 aña di eksistensia dia 7 di mei 2023 i lo ta algu tremendo e loke ku minister Van Heydoorn a primintí e organisashon.

Minister Van Heydoorn tambe a splika di un petishon pa duna e kaminda na entrada dje parke te kaminda ku ta bai ABC Bus Bedrijf e nòmber di ‘Kaya Pichingolo’, su ministerio tin un representante den e komishon i lo sostené e petishon ku lo tin di bai pa e ministerio di minister Charles Cooper.

Miembronan di e ekipo di softball Pichingolo/ Nissan kontenplando e plaka di merito.
Sr. Sithree Van Heydoorn entregando Mesiña Pulgar e plaka di merito.
Translate »