Sta Maria Pirates a logra su di dos triunfo den e kampionato nobo di beisbòl dòbel A. E tin sup kampion di Kòrsou a gana awe, djaweps 10 di mei 2018, ku skor di 10-3 di Groot Kwartier Stars.
E kompetensia den Liga Aqualectra ku ta keda organisá pa Federashon Besbòl di Kòrsou (Febeko), a kontinuá awe den Tio Daou Ballpark.
Groot Kwartier den di dos inen a bai dilanti 2-1 i ampliá esaki na 3-1 den di tres entrada. E Piratanan den nan di 4 turno a hinka 3 kareda pa asina bòltu e skor na nan fabor: 4-3. E ekipo di Sta Maria a skor e sigiuente turnonan respektivamente 2, 1 i 3 kareda pa finalmente gana e wega: 10-3.
Picher Johan Rifaela a gana e wega pa Sta Maria. Ela pèrmití 3 kareda i 5 hit den shete inen di trabou. Ela ponchá 13 bateadó i duna 3 base por bola. Raydel Isabella a relev’é den di 8 entrada.
Sorick Liberia, Jurgen Statie i Luis Peña a sobresalí na bate. Liberia a dal 3 hit den 4 turno i a empuhá 2 kareda. Statie tambe a bati 3 hit den 4 turno i a empuhá 2 kareda. Peña tabatin 2 hit den 3 turno i ku su batasonan ela hinka 3 kareda aden.
Picher pèrdèdó tabata Marverich Lourens. Den 4 inen ela pèrmití 6 kareda i 5 hit, miéntras ela ponchá 5 bateadó i duna 3 base por bola. Darren Winklaar mihó bateadó pa groot Kwartier ku 2 hit den 3 turno.
E kampionato ta sigui djasabra ku Fire Birds Citizen Insurance kontra Groot Kwartier Stars Mangusa. E enkuentro aki ta kuminsá mitar di 8 di anochi i ta tuma lugá den Stadion Johnny Vrutaal na Rif, Otrobanda.
E kompetensia despues ta kontinuá djadumingu ku dos wega den Parke Heintje Kool. Relashoná ku selebrashon di Dia di Mama, Febeko no ta kobra entrada na mamanan ku bai wak wega. Mitar di 11 mainta tin e klásiko entre Royal Scorpions Mr Baseball My Malls i Wild Cats Guardian Group/KJ74, miéntras ku mitar di 3 atardi Sta Maria Pirates Chippie ta hunga kontra Sta Rosa Indians.
