Sta Rosa Angels Vanddis a gana su di dos enkuentro den komienso dje kampionato di sòfbòl femenino fast pitch dòbel A. E aktual kampion a superá ayera, djarason 9 di mei 2018, Eagles Softex ku skor di 7-0.
Curaçaose Softball Bond (CSB) ta organisá e kampionato di sòfbòl femenino lokal, ku ta dediká na Pichingolo KIA/Nissan. E tim aki a kumpli 45 aña aktivo den sòfbòl. E kompetensia a kuminsá wikènt pasá i a kontinua ayera djarason. E weganan ta tuma lugá den Sabana Ballpark.
Despues di a gana Pichingolo Nissan den e wega inougural, ayera Sta Rosa Angels Vanddis a gana konvinsente di Eagles Softex: 7-0. Picher ganadó tabata Dianne Rosa, miéntras ku deidra da Costa Gomez a bati 2 hit den 3 turno na bate. Picher ku a pèrdè e wega tabata Nazira Martis i mihó bateadó a resultá Ryan Manuela, tambe ku 2 hit den 3 turno.
Den e otro wega ku a keda hungá ayera The Fighting Team a derotá Demolition Cartel NV ku skor di 7-4. Picher Marushka Mongen a gana e enkuentro i Sharon-Rose Delanoi Ruthsainy Calmera a dal 1 hit den 3 turno kada un. E picher Celeste Francisca a sufri e derota, miéntras ku Shalushka Redan a bati 2 hit den 2 turno na bate.
E kompetensia ta sigui mañan, djabièrnè 11 di mei, ku dos wega den Sabana Ballpark. Pa mitar di 8 anochi ta hunga kontra otro Sta Rosa Angels Vanddis i Demolition Cartel NV, miéntras ku mitar di 10 ta topa otro Nos Tei Curaçao Office Supply i Pichingolo Kia/Nissan.
Djasabra tambe tin dos wega den Sabana Ballpark. Mitar di 8 anochi Pichingolo KIA/Nissan ta hunga kontra The Fighting Team, miéntras ku mitar di 10 tin e enkuentro entre Eagles Softex i Nos Tei Curaçao Office Supply.