Royal Scorpions ayera, djarason 9 di mei, a gana su di dos enkuentro siguí den e kampionato di beisbòl dòbel A, Liga Aqualectra. Despues di a superá Sta Maria Pirates Chippie djasabra ei, e Skòrpiunnan a vapuliá Marchena Braves awor ku skor di 10-0.
E kompetensia di beisbòl ku ta keda organisá pa Federashon Beisbòl di Kòrsou (Febeko) a kontinuá ayera den Stadion Johnny Vrutaal na Rif, Otrobanda.
Scorpions a skor 2 kareda den di tres inen pa tuma ventaha ku e no a pèrdè mas. E tim a añadi 6 kareda den su di kuater turno i 2 kareda mas den di sinku entrada, pa asina gana e wega ku skor abultá: 10-0.
Picher Rowensley Klaber a kleim e triunfo, pèrmitiendo solamente 2 hit den 5 inen di trabou. Ela ponchá 4 bateadó i a duna 2 base por bola. Tambe a mira akshon riba montíkulo Nathaniel Macaya (1,1 inen), Nazjir Geertruida (0,1) i Gavanee Virginie (0,1).
Pa Royal Scorpions a destaká na bate Nisandro Cleofa, Roderick Bernadina i Andley Simmons. Cleofa a dal 2 hit den 2 turno i empuhá 2 kareda. Ku 2 hit den 4 turno Bernadina tabata bon tambe pa 2 kareda empuhá, miéntras ku Simmons a empuhá 4 kareda ku 2 hit den 4 turno. E picher pèrdèdó a resultá Frank Moron ku den 3,1 inen a pèrmití 4 kareda i 2 hit.
Wild Cats Guardian Group/KJ74 tambe a gana ku skor grandi djamars 8 di mei. E tim no tabatin ni’un tiki kompashon ku Fire Birds Citizens Insurance: 17-5. Esaki tabata e di tres triunfo sin derota pa e kampion di Kòrsou.
Despues ku Fire Birds a skor 1 kareda den kabes di promé inen, Wild Cats ta hinka 2 kareda den bòm di mesun entrada. E Pushinan Brabu despues a habri e wega for di otro, anotando 6, 4 i 5 kareda den nan turnonan sigiuente.
Picher ganadó tabata Sidney Antonia ku durante 5,2 inen a pèrmití 5 kareda i 12 hit na bateadónan di Fire Birds. Ela ponchá 4 i duna 2 base por bola. Kennimar Martina a remplas’é den di 6 inen. Picher C’Edeon Langguth a pèrdè e wega.
Raywendley van Gurp, Yurendell de Caster i Randolph Kirindongo a sobresalí den kaha di bateo pa Wild Cats. Van Gurp tabatin 2 hit den 2 turno, di kua 1 homerun i ela empuhá 4 kareda. De Caster a dal 1 hit den 1 turno i esaki tabata un homerun ku base yen, esta un ‘grand slam’. E tambe a empuhá 4 kareda i mas aleu a haña 4 base por bola. Kirindongo a bati 1 hit den 3 turno. Esaki tambe tabata un homerun. Ela empuhá 3 kareda i a haña 3 base por bola.
Pa Fire Birds e mihó bateadónan a resultá Laishenel Lacruz, Gedeon Noor i Ludwin Obispo. Lacruz a bati 2 hit den 2 turno, Noor tabata bon pa 3 hit den 3 turno, miéntras ku Obispo a dal 2 hit den 3 turno. Un di su hitnan tabata un homerun.
E kampionato di beisbòl dòbel A ta sigui awenochi ku e wega entre Sta Maria Pirates Chippie i Groot Kwartier Stars Mangusa. E enkuentro aki ta kuminsá mitar di 8 den Tio Daou Ballpark.
