FC San Lucas a bolbe okupá e promé lugá den divishon A dje kampionato lokal di futsal. E tim a gana ku skor di 3-1 di FFCE United FC i awor tin 10 punto for di 6 wega. Den divishon B e ekipo di FC Securitas Antias ta sigui komandá e tabla di posishon.
E kampionato di ku Futsal Federation Curaçao ta organisá aktualmente, ta sigui hopi kayente den tantu divishon A i B. Tabatin atrobe algun wega ku a keda hungá den sala Niels Liberia di stadion Odulio Willems den Suffisant.
FC San Lucas a gana su di 5 di 6 enkuentro te ainda den divishon A. E tim a gana e biaha’ki di FFCE United: 3-1. Pito Roosje, Everon Espacia i Jean Pauletta a hinka e golnan, miéntras ku Riddick Koeiman a salba honor pa e tim pèrdèdó.
Mas aleu Ocean View FC a triunfá ku skor di 5-3 riba Pantera Negras. E golnan a keda di skor pa Stallone Isenia (2) i Rayson Koeiman (2). Rodymar Willems di Pantera Negras a hinka un outogol, miéntras ku Naigel Valorian 1, Edelberto Gerard i Rhienzy Henriquez tambe tabata éksitoso aunke den kousa pèrdí.
FC San Lucas tin 10 punto for di 6 enkuentro: 5 triunfo i 1 derota. E aktual kampion ta okupá e promé luga riba tabla di posishon. FC-IGA, FC Babranis 01 i Ocean View FC ta kompartí e di dos puesto, tur ku 9 punto.
Den divishon B e tim di FC Securitas Antias ta ketu bai invikto. E tim a empatá na 1 gol ku Excellent. Quincy Wilson den e promé tempu a pone FC Securitas Antias dilanti, pero den di dos tempu Gilliard Elias a hinka e gol di empate pa Excellent.
Otro resultadonan den divishon B tabata: Fc Sta Helena vs FC Babranis 02 2-3, FC Ocean View Elite vs Dòmi 1-4, Sta Rosa Stars vs FC Five Stars 7-0 i Fabarma FC vs FC Celestial Boys 4-3.
FC Securitas Antias ta komandá riba e tabla di posishon ku 14 punto for di 8 enkuentro. E di dos puesto ta okupá pa Sta Rosa Stars ku 12 punto for di tambe 8 wega. FC Bandolino i Dòmi ta kompartí e di tres lugá ku 9 punto.