Centro Dominguito a propiná Jong Holland su promé derota den divishon superior di Federashon Futbòl di Kòrsou (FFK), esta Liga MCB: 2-1. Apesar di a pèrdè su invikto, tòg e tim Trikolor ta keda komfortabel na promé lugá ku 34 punto.
E kompetensia di futbòl a kontinuá den wikènt ku 5 enkuentro den Stadion Antoine Maduro, mihó konosí komo stadion di SUBT na Kintjan.
Centro Dominguito último enkuentronan a mustra hopi adelanto. E ekipo siman pasá a triunfá ku 2-1 riba Union Deportivo Bándabou (Undeba) i ayera djasabra -3 di mart- a gana ku mesun skor di Jong Holland.
E viktoria aki a pone ku Centro Dominguito a subi bai okupá e di 3 lugá riba tabla di posishon ku 19 punto for di 13 enkuentro. E tim a gana te ku awor 5 wega, tablá 4 i pèrdè tambe 4 enkuentro.
Jong Holland, apesar dje promé derota dje kompetensia, ta sigui sólido na promé lugá ku 34 punto for di 13 enkuentro: 11 viktoria, 1 empate i 1 wega pèrdí.
Skèrpènè den e otro enkuentro riba djasabra, a gana ku skor minimo (1-0) di Undeba. E ekipo di Fraternan tin awor 18 punto: 5 viktoria, 3 empate i 5 wega pèrdí. Undeba tin mesun sifranan i e dos timnan huntu ku Victory Boys ta kompartí puesto number 4 riba e tabla di posishon den Liga MCB.
Por sierto ku Victory Boys tambe a pèrdè su enkuentro riba djabièrnè kontra e tim Vriendschap Eendracht Sterken Tegen Alles (VESTA): 1-3. Ku e triunfo aki kombiná ku e derota di Jong Holland, VESTA a konsolidá su posishon na di 2 lugá ku 25 punto: 8 wega ganá, 4 pèrdí i 1 empate.
Awe djadumingu 4 di mart Jong Colombia a logra un otro triunfo importante. E biaha’ki e tim Saminero a dal Centro Social Deportivo Barber ku skor konvinsente di 3-1 i awor tin 12 punto. Barber ta keda ku 14 punto.
Finalmente Hubentut Fortuna ta gana su di 3 wega den e kampionato kontra 10 derota. E ti a triunfá ku skor di 3-1 riba Inter Willemstad. Apesar di esaki e tim di Seru Fortuna ta keda den sotano ku 9 punto. Inter Willemstad awor ta okupá di 7 puesto ku 17 punto.