Green Tigers riba e último dia dje kampionato regular di Federashon Vòlibòl di Kòrsou (FeVoKo) den klase superior maskulino, a superá Stakamahakchi ku skor di 3-1. Otro siman djadumingu e semi finalnan den e kategoria aki ta planiá.
FeVoKo a klousurá ayera djadumingu, 4 di mart 2018, e kampionato regular den tantu klase superior komo klase A. Tabatin un total di seis enkuentro den sala kubrí Errol Rooi di Sentro Deportivo Kòrsou (SDK) na Brievengat.
Den klase maskulino superior e tim di Green Tigers a gana ku skor di 3-1 di Stakamahakchi. Tabata un wega bon bringá. E parsialnan tabata: 25-16, 19-25, 25-20 i 25-23.
E posishon final dje ekiponan den klase superior maskulino ta: 1. Xaverianen, 2. Watakeli, 3. Stakamahakchi i 4. Green Tigers. Den e seri di weganan den semi final Xaverianen ta hunga kontra Green Tigers, miéntras ku Watakeli i Stakamahakchi ta enfrentá otro.
Den klase femenino superior e sigiuente resultadonan a keda registrá: Watakeli vs Green Jewels 3-0 25-12, 25-15 i 25-23; Shuatanari vs Hurricane 3-0: 25-15, 25-22 i 25-21.
Den klase A maskulino Titus a gana di Xaverianen ku skor di 2-0: 25-20 i 25-15. Green Tigers a superá Watakeli ku 2-1: 25-22, 24-26 i 15-13. E tim di Stakamahakchi a derotá Watakeli ku skor di 2-0: 25-20 i 25-17.
E timnan ku a klasifiká pa ‘play-off’ den klase A femenino ta: 1. Shuatanari, 2. Stakamahakchi, 3. Hurricane i 4. Watakeli. Awe djaluna mes ta ranka sali ku e weganan den semi final den e kategoria aki. Stakamahakchi ta hunga kontra di Hurricane i Shuatanari ta sali kontra di Watakeli. Tur dos enkuentro ta kuminsá kwartu pa 8 di anochi.