Wild Cats Guardian Group /KJ74 a kuminsá e kampionato 2018 manera ela tèrminá esun aña pasá: ganando di Sta Maria Pirates Chippie. Den e promé wega dje kompetensia den dòbel A, esta Liga Aqualectra, e kampion di Kòrsou a triunfá ku skor pèrtá di 7-6.
E kampionato nobo a ranka sali ayera, djasabra 21 di aprel 2018, den stadion Johnny Vrutaal na Rif, Otrobanda.
Den e seremonia di apertura a hiba palabra direktor Darick Jonis di Aqualectra ku ta patrosinadó prinsipal dje kompetensia. Tambe a hiba palabra minister di deporte Marilyn Alcalá-Wallé i presidente di Federashon Beisbòl di Kòrsou (Febeko) Micheline Heyliger.
Mas aleu Eric Jacobino a tene un orashon pa tur presente. Hungadó di Wild Cats a subi tereno kompañá pa muchanan ku tin simtomanan di down syndrome, miéntras esnan di Sta Maria Pirates tabata kompañá pa hungadónan hóben.
Despues di kanto di himno a sigui ku e wega entre Wild Cats i Sta Maria Pirates. Por sierto ku e dos timnan aki aña pasá tabata protagonista di un final largu ku a kaba ku 4-3 pa Wild Cats, ku a prolongá asina e titulo kampionil.
Sta Maria a kuminsá wega brabu, ora ku ela skor 1 kareda den su promé turno na bate. Wild Cats a bòltu e skor den bòm di dos entrada ku 2 kareda: 2-1. Tur dos tim a skor 1 kareda den di tres inen, miéntras ku Sta Maria ta empatá e wega den su di 4 turno na bate: 3-3.
E Piratanan den di seis inen ta skor 2 kareda i asina tuma ventaha: 5-3. Tur kos tabata mustra ke tim di Sta Maria tabata bai ku e viktoria, pero e Pushinan Brabu a burdugá den di 7 inen i skor 4 kareda pa bolbe bòltu e skor: 7-5. Sta Maria a purba un último atake den kabes di 8 entrada, pero a keda kòrtiku: 6-7.
Picher ganadó tabata Sidney Antonia ku a drenta di relevo den di seis entrada na lugá di Richinel Matos ku a habri wega i bai 5,1 inen. E picher habridó aki a pèrmití 5 kareda i 7 hit. Ela ponchá 2 bateadó i duna 4 base por bola. Di su banda Antonia den 2,1 inen a haña 1 kareda i 2 hit kontra. Ela ponchá 2 bateadó i duna 2 base por bola. Kennimar Martina a salba e wega, sakando e último out. Esaki tabata via di ponche.
Rojean Cleofa, Levi Carolus i Luisgardo Alvarez tabatin un bon anochi na bate pa Wild Cats. Cleofa i Alvarez a tèrminá ku 2 hit den 3 turno i kada un ku 2 kareda empuhá, miéntras ku Carolus tabata bon pa 2 hit den 4 turno i 1 kareda empuhá.
E promé derota di Sta Maria Pirates tabata pa picher Claysandy Hariquez, miéntras ku Johannes Gregorius Jr tabatin un anochi perfekto na bate. Ela dal 2 hit den 2 turno i empuhá 1 kareda.
