Sta Rosa Angels Vanddis awenochi, djarason 18 di aprel, a bolbe titulá kampion hubenil di sòfbòl di Kòrsou. E tim a gana tambe e di dos wega den final kontra di Souax Gill’sport i asina konkistá su di 4 titulo kampionil konsekutivo.
Direktiva di Curaçaose Softball Bond (CSB) por mira’tras riba un otro éksitoso kampionato hubenil, ku a keda patrosiná pa MCB. E bueltanan preliminar i despues e pre-final i weganan final a transkurí segun plan.
Souax Gill’sport tabatin un bon aña i asta a tèrminá na promé lugá. E tim e aña aki asta a logra gana porfin algun wega di Sta Rosa Angels, pero den final e ekipo kampion a regla kuenta k’e tremendo ekipo di Souax.
Den final a hunga un asina yamá ‘best of 3’, pues e tim ku gana dos wega ta kampion. E sòfbolistanan di Sta Rosa Angels a gana e promé enkuentro ku a tuma lugá djabièrnè 13 di aprel den Buena Vista Ballpark i awenochi a bolbe triunfá den Sabana Ballpark: 12-5.
Aunke e skor no ta mustra, pero e wega tabata duru bringá i a kana basta pareu te ku di 4 entrada. Ku Sta Rosa Angels dilanti 6-5 dilanti, e picheo di Souax Gill’sport a kai den otro den di 5 inen i asina Angels a skor 6 kareda mas pa gana via di nòkout.
Picher ganadó a resultá Darlysse Salesia, miéntras ku Danisha Salesia a bati 1 hit den 2 turno. Pa Souax Gill’sport a pèrdè e wega picher Kiara Domacassé. Sueny Felicia a gana e premio di hungadó mas balioso. Ku su bate kayente ela karga e tim di Sta Rosa Angels Vanddis e kampionato aki.
