Curaçao Baseball Development Foundation (CBDF) nunka a risibí un depchi di e organisashonnan Haarlemse Honkbal Week i World Port Tournament. E fundashon deportivo, presidí pa Philip ‘Lipo’ Elhage, asina’ki ta desmentí informashon ku Federashon Beisbòl di Kòrsou (Febeko) a duna durante su reunion general.
Febeko ku ta presidí pa Micheline Heyliger, djaluna tras di lomba tabatin su reunion general ku klupnan miembro. Esaki ta promé ku komienso di kampionato di beisbòl den klase dòbel A.
A yega na orea di miembronan di direktiva di CBDF, ku durante e reunion general enkuestion nòmber dje fundashon deportivo a keda mentá. Parse ku for di seno di Febeko a informá klupnan ku CBDF ta haña sosten finansiero di organisashonnan di beisbòl na Hulanda.
“Durante reunion general di Febeko djaluna anochi un miembro di direktiva lo mester a deklará ku CBDF ta risibí 15% di ganashi di Haarlemse Honkbalweek, miéntras ku Febeko mes no ta risibí nada. Esaki ta un deklarashon totalmente robes i infundá”, segun CBDF.
“Al kontrali, ku intermediashon na 2015 di CBDF a logra ku tur aña Febeko a bolbe haña invitashon pa bai Haarlemse Honkbal Week i World Port Tournament na Rotterdam. Di ningun forma CBDF no ta forma parti di organisashon di ningun di e dos torneonan aki, ní ta risibí nada for di nan”, CBDF ta kontinuá su deklarashon.
E deklarashon ta sigui: “CBDF a keda funda riba petishon i aserkamentu di propio Koninklijke Nederlandse Baseball en Softball Bond (KNBSB). CBDF no a lanta pa djei bai wak kon ta bai atendé ku beisbòl. CBDF ta yuda ku beisbòl en general, tur aktor di beisbòl di Kòrsou di un forma of otro a yega di haña yudansa di e fundashon i esei ta inkluí FBEKO tambe”.
Pues CBDF a keda funda ku e solo meta prinsipal pa yuda ku desaroyo di beisbòl na Kòrsou i pa asina por realisá e potensial máksimo di esaki: “Den tres aña e logronan di CBDF tabata signifikante. Tur esaki tabata posibel pa donashon risibí di KNBSB, Major League Baseball (MLB), Curacao Baseball Week i personanan privá ku for di prinsipio a depositá nan konfiansa den e fundashon aki. Tur aña un relato amplio ta sali ku splikashon detayá unda kada depchi di nan donashon a bai”.
CBDF ta añadí ku e fundashon a yuda ku desaroyo di beisbòl en general durante e último tres añanan ku reintrodukshon di RBI Curacao, Coaches Development Program ku asistensia di mas ku 40 coach i MLB Elite Program.
Asina CBDF a organisá un showcase internashonal huntu ku MLB ku a trese un kantidat rekòrt di scout di masha hopi organisashon di Liga Grandi Kòrsou. A organisá un kurso pa tur umpire di tur nivel di nos beisbòl lokal. CBDF a yuda vários torneo lokal di Little League ku material, a yuda tur e liganan di beisbòl di Kòrsou i organisashonnan ku material i vários organisashon a haña sosten ora ku esaki tabata nesesario.
Finalmente e fundashon deportivo presidí pa Lipo Elhage ta aksentuá ku: “Meta di CBDF ta prinsipalmente pa kontribuí ku desaroyo di beisbòl den su totalidat di Kòrsou. No por ta asina si ku ta insinuá i duna informashon inkorekto pa pone e fundashon den un lus negativo. Hamas i nunka CBDF a risibí un depchi for di e organisashon di Haarlemse Honkbal Week ni WPT. CBDF ta spera sinseramente ku direktiva di Febeko ta koregí e informashon inkorekto aki. CBDF ta habri semper pa traha ku FEBEKO a base di un relashon di konfiansa manera tabata e kaso semper den pasado”.
Foto:
Aña pasá e organisashon Curaçao Baseball Week a hasi un donashon di 18.000 florin na CBDF. Riba e foto presidente di CBDF Philip ‘Lipo’ Elhage (na man drechi).