E kampionato di beisbòl di Kòrsou ta ranka sali djasabra awó, 21 di aprel 2018, den stadion Johnny Vrutaal na Rif, Otrobanda. E kompetensia den kategoria máksimo, esta dòbel A, e aña’ki tambe ta keda patrosiná pa Aqualectra.
Federashon Beisbòl di Kòrsou (Febeko) presidí pa Micheline Heyliger ta organisá e kampionato. E aktual kampion di beisbòl lokal ta Wild Cats. E tim aki a gana e kampionato, Liga Aqualectra, dos aña konsekutivo.
Porsierto ku e kompetensia di aña pasá a dura hopi, pasobra den e seri final entre Wild Cats i Sta Maria Pirates tabatin algun insidente ku a trese hopi tardansa.
Tabatin prinsipalmente un desakuerdo grandi tokante dje hungadó Curtley Doran di Pirates. E kampionato di beisbòl den klase dòbel A a kuminsá riba 8 di aprel i terminá finalmente riba 25 di novèmber.
Awor tur kos ta kla pa apertura dje kampionato 2018. Esaki ta planiá pa tuma lugá djasabra awó, 21 di aprel. Mas detaye dje kompetensia aki ta sigui despues.