FC San Lucas a bolbe pasa pa komandá e tabla di posishon den divishon A di Futsal Federation Curaçao. E kampion di Kòrsou a gana den wikènt ku skor mínimo (1-0) di FC RO Family. Den divishon B e tim di FC Securitas Antias ta sigui invikto na kabes.
E bueltanan preliminar dje kampionato di futsal di Kòrsou ta keda hungá den sala Niels Liberia di stadion Odulio Willems den Suffisant. Den wikènt tabatin atrobe diferente enkuentro den tur dos divishon.
Den divishon A tabata Jursley Kroonstadt ku a hinka e úniko gol dje wega pa asina FC San Lucas gana di FC RO Family. Esaki a sosodé den e promé tempu dje enkuentro. E triunfo aki a pone ku e kampion di Kòrsou a bolbe bai okupá e promé lugá ku 8 punto: 4 wega ganá i 1 pèrdí.
Mas aleu FC IGA tabata hopi produktivo, ganando ku skor di 5-3 di FC Don Bosco. Elgery Renauld, Alexander Klooster, Raymond Harry, Javier Junior i Djurson Pieters a hinka gol. Pa e tim pèrdèdó tabata éksitoso; Ottmar Mercera, Ruwensley Leuteria i Jair Colina.
E enkuentro entre Ocean View FC i FFCE United FC tambe tabatin hopi gol: 6. Ocean View FC a gana ku 4-2. Stallone Isenia i Jamian De Kaster a hinka kada un 2 gol pa e tim ganadó, miéntras ku pa e ekipo pèrdèdó Tyndell Mattheus i Dannick Koeiman a skor.
Den divishon B e sigiuente resultadonan a keda registrá: FC Ocean View Elite vs FC Sta Helena 0-2, FC Five Stars vs FC Celestial Boys 3-0 i FC Bandolino vs Sta Rosa Stars 3-1.
