Un total di 10 federashon di ahedres di islanan den Karibe a konfirmá nan partisipashon na Carifta Junior Chess Championships 2019 na Kòrsou. Esaki ta dos bònt mas tantu ku aña pasá na Surnam. Alex Roose di Kòrsou ta fungi komo arbitro prinsipal dje kampionato hubenil di ahedres aki.
Direktiva di Federashon Ahedres Kòrsou (Fedako) ta hopi kontentu ku e gran akohida bou di islanan den Karibe pa kompetí na Kòrsou. E federashon lokal ta traha den estrecho kopereshon ku promotor/organisadó di evento Jimmy Izijk.
Carifta Junior Chess Championships 2019 ta tuma lugá di 18 pa 23 di aprel próksimo den Hilton Beach Resort. Federashon dje sigieunte 9 islanan a konfirmá te ainda nan partisipashon na e kampionato: Antigua & Barbuda, Aruba, Bahamas, Barbados, Bermuda, Guyana, Jamaica, Surnam i Trinidad & Tobago. Dimes Kòrsou komo anfitrión tambe ta kompetí totalisando 10 federashon ku pues ta dos mas tantu ku aña pasá.
E delegashonnan ta kuminsá yega Kòrsou riba djaweps 18 di aprel. Riba e dia aki lo tin registrashon dje hungadónan, reunion tèniko i apertura ofisial. E sigiuente dia, esta riba djabièrnè 19 di aprel ta hunga e promé i di dos buelta, siguí pa djasabra, djadumingu i djaluna tambe dos buelta ku riba mesun djaluna tambe klousura i entrega di premio.
Fedako ta anunsiá mas aleu ku Alex Roose ta fungi komo e arbitro prinsipal dje di 8 edishon di Carifta Junior Chess Championships 2019. Ten su ten e tabata un dje bon ahedresistanan i a yega di representá Kòrsou den vários kompetensia internashonal.
Alex Roose ta un rèfri ku for di 2005 tin akreditashon internashonal di FIDE ku ta e federashon mundial di ahedres. No mas ku fin di aña pasá novèmber e tabata aktivo komo arbitro durante Olimpiada di Ahedres na Batumi, Georgia. Ela fungi komo rèfri tambe den olimpiadanan di Istanbul na Turkia (2012), Tromso na Noruega (2014) i tambe Baku na Azerbazjan (2016).
Relashoná ku e di 8 edishon di Carifta Junior Chess Championship aki, Fedako i promotor Izijk ta hopi gradesido na e sigiuente patronisadónan: ministerio di Eseñansa, Siensia, Kultura i Depiorte di gobièrnu, Maduro & Curiel’s Bank (MCB), Refineria di Kòrsou (RdK), Banco di Caribe (BdC), Seaquarium Park Curaçao i Stichting Johannes Bosco. Sin nan patrosinio e kampionato lo no tabata posibel na Kòrsou.
Pa mas informashon públiko general i amantenan di ahedres hubenil por klek riba www.curacaochessfederation.com.