Royal Scorpions a gana awenochi, djamars 3 di ougùstes, ku skor di 8 pa 2 di Sta Maria Pirates. Ku e resultado aki e tim Skòrpiun awor a pasa pa komandá e tabla di posishon den Liga Amstel Bright ku 7 wega ganá i 1 derota. Wild Cats despues a pèrdè ayera djaluna di Sta Rosa Indians k10 pa 8 awor ta okupá e di dos puesto ku 6 triunfo i 1 derota.
Federashon Beisbòl di Kòrsou (Febeko) a sigui awe djamars ku e kampionato den dòbel A, esta Liga Amstel Bright. Royal Scorpions i Sta Maria Pirates a topa otro den Tio Daou Ballpark.
E tim Skòrpiun a skor 1 kareda den bòm di promé inen pa tuma ventaha di 1-0. E Piratanan den kabes di nan di dos turno a bate a skor 2 kareda pa bai 2-1 dilanti.
Scorpions den bòm dje di tres inen a empatá e wega na 2 kareda, pa despues skor 3 kareda den di kuater i di sinku inen i asina sigurá e viktoria: 8-2.
Dennis Gustina a sobresalí na bate pa Scorpions ku 2 hit den 3 turno. Ela skor 2 kareda i ku su 2 hitnan tambe a sòru pa 2 kareda drenta. Jadon Gosepa tambe tabatin un bon anochi na bate ku 2 hit den 3 turno.
Picher Ternesh Lourens a gana e wega pa Scorpions. Den 6 inen di trabou ela pèrmití 2 kareda riba 3 hit, di kual 1 homerun di Denzel Gregg. Lourens mas aleu a ponchá 6 batiadó i duna 2 base por bola.
Un dia promé, esta djaluna, Sta Rosa Indians a propiná Wild Cats su promé derota dje kampionato ganando ku skor di 10 pa 8. E wega aki a tuma lugá den Stadion Johnny Vrutaal na Rif.
Despues ku e Pushinan Brabu a skor 1 kareda den nan promé turno, e Indjannan a kontestá ku 5 kareda den bòm dje promé inen. Ku 1 kareda mas den di dos inen, Sta Rosa a tuma ventaha komodo di 6 pa 1. Wild Cats sinembargo no a entregá i ku 3 kareda den di tres inen a aserká ten a 4-6.
Ku 1 kareda den tantu di kuater komo di sinku inen Wild Cats ta empatá e wega na 6 kareda. Pero Sta Rosa den bòm dje mesun inen a skor 3 kareda pa bolbe bai dilanti: 9-6. E tim Indjan den su di seis turno na bate a skor 1 kareda mas pa yega 10 kareda. E Pushinan Brabu a purba di bini bèk den e wega, pero ku 2 kareda den di shete inen tòg a keda kòrtiku I a pèrdè ku skor di 10 pa 8.
