E selekshonnan di Liga Pabou por mira atras riba tremendo prestashon den e promé parti dje Aruba & Curaçao Baseball Classic. Nan a gana ku relativo fasilidat di nan kontrinkantenan den Minor, Little i Intermediate League.
Timnan di Aruba a bishitá Kòrsou pa hunga den e torneo di beisbòl dje organisashon di Curaçao Little League ku a tuma lugá e dianan aki den Tio Daou Ballpark. E kompetensia a sigui awe djaluna den Senior League, miéntras ku djarason tambe tin un wega programá den Junior League.
Despues e timnan ta viaha pa Aruba, kaminda e di dos parti dje torneo ta sigui. E weganan aki ta hunga e orei riba Pos Chiquito Baseball Field na Pos Chiquito.
Den Minor League e selekshon di Liga Pabou a gana ku skor di 11 pa 1 di Aruba Center League. Den e kompetensia den Little League Liga Pabou a gana ku skor di 13 pa 0 dje selekshon di Aruba North League, miéntras ku den Intermediate League Liga Pabou a derotá Liga Pariba ku skor di 13 pa 3.
Durante e kompetensia entre timnan di Aruba i Kòrsou, e komishon organisadó di Curaçao Little League a honrá algun Baluarte. Esakinan tabata entre otro Vernong Isabella, Johannes ‘Didi’ Gregorius I Ghionello ‘Nelo’ Jansen.
