Sport.cw

Sponsored by

Sponsored by

Sponsored by

San Lucas i Don Bosco pa final

FC San Lucas a kaba Kaya 4 di CurFutsal invikto ku 6 punto for di 3 wega. E tim a gana awe, djaweps 15 di novèmber, ku skor di 4-2 di Securitas. FC Don Bosco a goliá Sta Rosa Stars 6 pa 2 pa seyá tambe su klasifikashon pa final kontra di San Lucas.

Meskos ku e dos fechanan anterior, fanatikonan di futsal a disfrutá di dos bon wega den divishon A. Esakinan tambe a tuma lugá den Sala Niels Liberia di Stadion Odulio Willems den Suffisant. Esaki tambe a konta ku arbitrahe di Omar Pauletta, Heinrich Angel, Rolf Pranger, Franklin Benitez i na mesa Deetje Wederfoort

FC San Lucas meskos den su dos otro weganan, awe tambe a ranka sali brabu riba Securitas. Tabata Oscar Vegas ku for di trempan a hinka un gol pa pone su tim dilanti. Quincy Wilson a empatá e wega, pero Vegas despues tabata éksitoso atrobe: 2-1.

Den di dos tempu tabata Jean Pauletta ku a skor dos biaha pa FC San Lucas. Dje tim kontrali Freddy Hernandez tabata eksitoso. E wega a tèrminá ku skor di 4 pa 2 na fabor di San Lucas. Esei tabata e di tres viktoria pa San Lucas ku pues a tèrmina Kaya 4 invikto ku 6 punto.

Den e di dos wega di awenochi FC Don Bosco tambe a kuminsá goloso i a skor 3 gol den e promé tempu: 3-0. Shudelmar Dorand a hinka dos gol, miéntras ku Ruensley Leuteria tambe a skor. Den di dos tempu mesun hungadónan aki skor, miéntras ku Jurensley Martina i Roderick Cleopa a hinka gol pa Sta Rosa Stars.

Esei tabata e di dos viktoria pa Don Bosco, despues ku e tim a zona un kampanaso riba e promé fecha ganando di Securitas 5 pa 4. E tim bou di guia di Jessica ‘Jess’ Victoria riba e di dos fecha tabatin ku rekonosé San Lucas komo e mihó: 2-5. E ta haña chèns pa tuma revanche p’e derota aki den final.

E posishon final di Kaya 4 dj kampionato di CurFutsal ta: 1. FC San Lucas 6 punto, 2. FC Don Bosco 4 punto, 3. Securitas 2 punto i 4. Sta Rosa Stars 0 punto.

Translate »