Sport.cw

Sponsored by

Sponsored by

Sponsored by

Aña ta habri ku Baseball Week

Aña 2022 ta habri ku e evento grandi Curaçao Baseball Week. Esaki ta tuma lugá di 3 te ku 8 di yanüari 2022. Vários gran hungado di beisbòl ku ta hunga den Minor i Major League na Merka, lo duna klínikanan na e hóben talentonan lokal.

E organisashon dje Curaçao Baseball Week ku èks hungadó i dirigente Hensley Meulens na kabes, a tene un rueda di prensa ayera djarason 24 di novèmber. Esaki a tuma lugá den hotel Corendon den Otrobanda.

“Pa motibu di e pandemia no por a organisá Curaçao Baseball Week aña pasá, pero nos ta kla pa habri 2022 den gran forma,” Hensley Meulens a duna di konosé. E tabata e promé hungadó di beisbòl yu di Kòrsou ku a hunga den Major League Baseball (MLB).

Meulens a tabata 10 aña aktivo komo ‘batting coach’ di San Francisco Giants. Ku e tim aki ela gana ‘World Series’ na tres okashon. Ela splika ku e meta prinsipal di Curaçao Baseball Week ta pa duna bèk na komunidat. “E hobennan ku ta pertenesé na timnan lokal di beisbòl ta risibí un oportunidat úniko pa siña di hungadónan di MLB, ku ta poniendo Kòrsou su nòmber riba mapa mundial. Ta un eksperiensia úniko ku nos por siña hóbennan e último téknikanan di beisbòl,” e ta splika.

Na 2022 Curaçao Baseball Week ta selebrá dies aña di eksistensia, miéntras ku pa mas ku 30 aña kaba Meulens ta organisá klínikanan pa hobennan. “Antes nos tabata tene klínika na Kòrsou, pa despues biaha pa Aruba i Boneiru tambe. Tabata un periodo hopi largu i intenso. Na momentu ku nos a ser aserká pa Blue Bay nos a kuminsá ku e Curaçao Baseball Week ku ta enserá un siman yená ku klínika i ‘coaching’ pa tantu hoben- komo entrenadónan di beisbòl.”

Translate »