Pichingolo Nissan a prolongá su titulo kampionil ganando e di kuater wega den final di sòfbòl femenino fast pitch. E tim a gana ku skor di 6-1 di Souax Cill’s Sport, ku sinembargo a lucha balentemente te final.

Direktiva di Curaçaose Softball Bond (CSB) por mira’tras riba un bon aña kompetitivo. E bueltanan preleminar i tambe e seri di weganan entre e finalistanan a transkurí sin problema, apesar ku e federashon dado momento no tabatin sufisiente umpire na su servisio.

E final entre Pichingolo Nissan i Souax Gill’s Sport tabata digno di un tremendo klousura dje temporada. E dos timnan aki a topa otro vários biaha e temporada aki, esta den e kompetensia regular, despues semi final i awor e seri final.

Ayera, djarason 24 di novèmber, Pichingolo i Souax a topa otro no menos ku 10 biaha e aña’ki. Esakinan tabata 4 wega den bueltanan preleminar, 2 den semi final i atrobe 4 den e gran final.

Den e wega di ayera ku tambe a tuma lugá den Sam Bunting Ballpark den Brievengat, tabata Pichingolo ku a subi bòrchi promé. Esaki tabata den di kuater inen ora ku e kampion a skor 2 kareda. Den bòm dje mesun inen Souax a hinka 1 kareda: 2-1.

Den kabes di seis inen Pichingolo a habri’fó ku 4 kareda pa sigurá viktoria. Den e turno na bate aki Emely Jonis ku semper tei pa yuda su tim, a dal un homerun, bon pa dos dje karedanan. Souax tampoko tabatin su mihó fildeo den e entrada aki.

Souax den bòm dje mesun di seis inen a harmá un atake purbando pa aserká Pichingolo. Sinembargo esaki no a resultá. E biaha aki tabatin erornan mental ku a kondusí na korementu di base malu.