Inter Willemstad ayera a gana su di tres wega den Kaya 6 di Liga MCB, derotando Jong Holland 3-2. Sinembargo e tim tin 6 punto só i tin ku kompartí e promé puesto ku Skèrpènè, komo ku ela pèrdè e protesta ku SUBT a entamá kontra dje.
Den e seri di wega ku a tuma lugá riba djabièrnè 19 di novèmber, Inter Willemstad a goliá SUBT ku skor di 6-0. E tim dje Barikahelnan sinembargo a protestá e wega.
E protesta tabata pa motibu ku Inter Willemstad a hunga ku Pedro de Sousa. E hungadó aki tambe ta aktivo den segunda divishon komo dirigente di Union Deportivo Tera Kòrá i a haña karchi kòrá algun dia promé ku e wega den promé divishon djabièrnè ei.
E komishon di protesta di Federashon Futbòl Kòrsou (FFK) a atende e protesta di SUBT i a duna e tim di Kinchán i besindario rason. Komo kastigu pa tòg a laga De Sousa hunga, e komishon a duna e tim dje Barikahelnan e wega ganá i 3 punto, miéntras Inter Willemstad a pèrdá 3 punto.
Apesar di a pèrdè e protesta i 3 punto, ainda Inter Willemstad ta sigui na kabes di Kaya 6. E tim ku porsierto ta bisiña i alabes ruman chikí di SUBT a gana ayera di Jong Holland ku skor di 3-2.
Davidson Rosa na apenas di 8 minüt a skor pa asina pone Inter Willemstad 1-0 dilanti. Na di 17 minüt Ruensley Leuteria a amplia e skor na 2-0. Rudrick Pop na di 35 minüt a skor i hasi e wega 3-0, pero na presis 45 minüt promé ku pousa bai aden Mirco Colina Jr a hinka e promé gol pa Jong Holland. Mesun hungadó aki den tempu èkstra, este 90+ minüt, a skor e di dos gol.
Skèrpènè ku a kai sorprendentemente 4-1 djabièrnè kontra Victory Boys, a rekuperá lihé di e derota aki ganando ayera ku skor di 2-1 di SUBT. Na di 32 minüt Benjamin Gil Guedez a pone e tim di Fraternan 1-0 dilanti. Michelangelo Beers na di 58 minüt a empatá e wega pa e tim dje Barikahelnan. Nicolás Rocha Gomez na di 82 minüt a seyá e di dos triunfo pa Skèrpènè.
E di tres wega di ayera a bai entre Victory Boys i FC Sithoc. E tim di Zapateer i bisendario a empatá 0-0 ku e ekipo dje Kolegialnan.
Despues di tres fecha di kompetensia, Inter Willemstad i Skèrpènè ta kompartí e promé lugá ku 6 punto for di 3 wega. Victory Boys i Jong Holland ta okupá e di tres lugá ku 4 punto for di 3 wega. SUBT ta sigui ku 3 punto i FC Sithoc ta sera kurá ku 2 punto.