Souax Gill’s Sport ayera a gana 3-2 di Pichingolo Nissan pa asina fòrsá un di kuater wega den final di sòfbòl femenino fast pitch. E wega tabata hopi emoshonante. Danki na hit di oro di Ivaniela Belfor i tremendo relevo di picher J’Dah Girigorie ku Souax a gana.
Sport.cw den e tres weganan di final entre Pichingolo i Souax a ripará un rivalidat grandi entre e dos timnan aki. Esaki sinembargo no tin ku redundá den enemistat ni deslusí e seri. Pues ta bon pa e timnan keda Deportivo, esta kumpli ku ‘fair play’.
Tabatin dado momento un akshon riba tereno ku kasi por a kouse un aksidente grave. Tabata na momento ku Julise Koffie di Pichingolo a dal un homerun i tira su bate den laira di alegria. Esaki sinembargo a bai kai riba montíkulo i kasi por a dal i kousá un leshon serio na e picher di Souax.
E wega riba su mes tabata digno di enkuentro di un seri final. E tabatin fuera di bon bateo, tambe tremendo picheo i bunita fildeo. Tur dos tim tabata pareu na otro.
Ku e skor empatá na 2 kareda, Souax a logra bai dilanti. Tabata Ivaniela Belfor ku a bati hit pa ‘center field’ pa’sina su tim pika 3-2 dilanti.
Den bòm dje di shete inen Pichingolo a menasá di empatá e wega i asta gana esaki, ora ku dos hungadó a embasá. Ku solamente un out, Souax a kambia picher i bin ku su estelar J’Dah Girigorie. E hoben a pochá e dos batiadónan ku a tuma turno pa asina sigurá e promé viktoria pa Souax.
Souax Gill’s Sport a tèrminá ku 3 kareda riba 6 hit i e tim no a hasi eror. Picher ganadó a resultá Mellizienne Haynes, miéntras ku J’Dah Girigorie a salba e wega. Mihó batiadónan tabata Kimberley Agard i Ashanty Alexandre. Tur dos a bati 2 hit den 3 turno (3-2).
Pichingolo Nissan a skor 2 kareda, bati 7 hit i hasi 1 eror. Picher Julise Koffie a pèrdè e wega. Mihó batiadó tabata Michenou Marselia ku tabatin 2 hit den 2 turno. Julise Koffie a dal un homerun.
E seri final ta sigui mañan djarason, 24 di novèmber, ku e di kuater wega. Pichingolo Nissan ta dilanti 2-1 i mester di 1 viktoria mas pa prolongá su titulo kampionil.