Firebirds Padres a konsolidá su promé lugá den e kampionato di RBI ganando su dos weganan den wikènt. E tim awor tin 9 wega ganá i 1 derota só. Marchena Braves i Groot Kwartier Astros tambe a gana su dos weganan, miéntras ku Wild Cats/St. Michiel Dodgers a sufri dos derota.
E kampionato di RBI patrosiná pa Maduro & Curiel’s Bank (MCB) a sigui den Tio Daou Ballpark. Dje 7 weganan programá esun entre Padres i Dodgers a hala mas atenshon, komo ku e dos timnan aki te na e momento ei tabatin mesun rèkòrt, esta 7-1.
Padres no a laga niun duda kua dje timnan ta mihó. Ela gana ku skor grandi di Dodgers: 13-3. Den di tres inen e tim a skor no menos ku 9 kareda pa asina for di tempran seyá e viktoria.
Picher Djenoir Mogen a gana e wega pa Padres, miéntras ku Clarence Martina tabatin un dia perfekto na bate. Ela dal 3 hit den 3 turno. Picher pèrdèdó tabata Cleavon Lasten i Nahiem Mutueel tambe a bati 3 hit den 3 turno (3-3) pa Dodgers.
Firebirds Padres a sigui ku su racha di viktoria, ganando tambe di Suffisant Royals ku skor di 12-2. Picher ganadó tabata e biaha’ki Clarence Martina. Pa Royals picher Vienerick Francisca a sufri e derota i Aliander Santana Mieses a bati e úniko hit dje tim.
Marchena Braves a gana primeramente di Royal Scorpions Cardinals ku skor di 7-4. Picher ganadó tabata Nwigher Francisca, miéntras ku Raydjen Rosina i Tha-Vish Doran a bai di 3-2. Picher pèrdèdó tabata Lyendley v/h Kruis.
Despues Marchena Braves a gana su di dos wega. Esaki tabata di Wild Cats/St. Michiel Dodgers: 12-10. Raydjen Rosina tabata e picher ganadó. Picher Keorden Leito a pèrdè e wega, miéntras ku Nahiem Mutueel a bai di 3-3 na bate pa Dodgers.
Mas aleu Groot Kwartier Astros a sorprendé Sta. Rosa Indians ku skor grandi di 14-3. Picher ganadó tabata Tristan Calmes i Terrence Martis a bai di 4-3. Najearlon Reinillia i Daysheron Luciano a dal homerun pa Astros. Picher Gion Oleana a pèrdè e wega pa Indians a resultá mientras ku Nyzar Martins-Pereira a bai di 1-1 na bate.
Tambe Astros a nòkout Suffisant Royals 16-0. Picher David Raap a gana e wega i Najearlon Reinilia tabata mihó batiadó ku 2 hit den 3 turno. Un dje hitnan tabata un homerun. Picher pèrdèdó tabata Alexys Snel i Kyran Flores tabatin e úniko hit pa Royals.
Finalmente Royal Scorpions Cardinals a blankea e ekipo di Sta. Rosa Indians ku skor di 11-0. Picher ganadó tabata Jaydon Gosepa i mihó bate pa Cardinals tabata Nazir Fernandez i Elian de Jesus Payano ámbos di 1-1. Picher pèrdèdó tabata Shurick Mouricia i mihó bate pa Indians Nyzar Martins-Pereira i Jurvenier Rijnschot ámbos di 1-1.
Te ainda tres tim ta sigur di nan klasifikashon pa play-off. Esakinan ta Firebirds Padres, Marchena Braves i Wild Cats/St. Michiel Dodgers. Falta un tim mas. E bataya pa e lugá aki ta bai ta entre Sta Rosa Indians, Royal Scorpions Cardinals i Groot Kwartier Astros.
E kampionato di RBI patrosiná pa MCB ta sigui djabièrnè den Tio Daou Ballpark.
