Royal Scorpions e aña aki realmente a piká mata un bes. Despues di a eleminá Wild Cats den 3 wega siguí den semi final, e tim Skòrpiun den final a registrá 4 triunfo siguí riba Sta Rosa. Asina e organisashon a bira kampion indiskutí di beisbòl dòbel A.
E tim di Royal Scorpions a konkistá e titulo kampionil djárason anochi derotando Sta Rosa Indians ku skor di 7 pa 5. Esaki tabata e úniko wega den final di ku e kampion nobo di beisbòl dòbel A a skor menos ku 10 kareda.
E ofensiva di Royal Scorpions den e ‘play off’ tabata bestial. Den semi final e tim a skor 39 kareda den 3 wega kontra di Wild Cats. Esaki ta un promedio di 13 kareda pa enkuentro. Den final e Skòrspiunnan a bombardiá Sta Rosa Indians ku 47 kareda den 4 konfrontashon, ku ta bon pa un promedio di kasi 14 kareda pa wega.
E viktorianan di Royal Scorpions riba Sta Rosa Indians den final tabata wega 1 ku skor di 12 pa 4, wega 2 a kaba 13 pa 8, wega 3 a tèrminá 15 pa 8 i finalmente wega number 4 tabata 7 pa 5. E skornan kontra di Wild Cats den semi final tabata 18 pa 4, 4 pa 3 i 17 pa 14.
