E organisashon di Atlanta Braves djabièrnè 8 di sèptèmber 2023 a retirá e nr 25 ku Andruw Jones tabatin riba su uniform. Esaki a tuma lugá promé ku e wega di Atlanta kontra di Pittsburgh Pirates. Porsierto ku e yu di Kòrsou a hasi picheo ofisial dje wega aki ku Ozzie Albies, otro yu di Kòrsou, fungiendo komo kètcher.
Andruw Jones a debutá na aña 1996 den Major League Baseball (MBL) ku Atlanta Braves. E tabatin apenas 19 aña i a haña e apodo serka naradónan i komentaristanan di beisbol di ‘The Curaçao Kid’.
Den e mesun aña ku Andruw Jones a debutá, ela prestá bon i tabata hopi konsistente. Ela subi MLB komo prospekto grandi i tabata konsiderá un asina yamá Five Tool Player. Esaki ta nifiká ku e ta bati bon pa average, e tin tambe poder na bate, e ta kore duru, su fildeo ta tremendo i e tin un bon brasa.
Andruw Jones foi 1996 a hungá 12 temporada siguí den Atlanta Braves, konsagrando su mes komo un hungadó klave dje organisashon. E yu di Kòrsou a gana 10 Golden Glove Awards i ta konsiderá komo un dje mihó centerfieldernan den MLB. Den bateo tambe ela sobresalí ku vários hit bou di kua hopi homerun, miéntras ku e tabata lihé riba base yegando safe na seguna base.
Ku Atlanta Braves retirando nr 25, Andruw Jones a bira e di 11 miembro (hungadó i/òf mènedjer) dje tim ku a retira su number. Anteriormente ela kaba ela drenta Salon di Fama dje organisashon aki.