Kòrsou a pèrdè Little League World Series 2023 awe djadumingu 27 di ougùstùs, luchando te final. E tim representando region West di Merka despues di un lucha tenás a gana ku skor pèrtá di 6-5. Apesar dje derota Kòrsou ta kampion Internashonal ganando di timnan di kuater region di mundu!
E tim di Liga Pabou a representá Kòrsou i region di Karibe dignamente den Little League World Series 2023. Pa di dos aña konsekutivo Kòrsou a logra gana e kompetensia internashonal.
Den e kampionato ei Kòrsou no tabatin’é fasil kontra di kontrinkantenan fuerte riba nivel mundial. Asina Kòrsou a sali gana e tim representando e kontinente Australia (2-1), despues ku mesun skor gana di Venezuela representando Latino Amérika.
Kontra Taiwan konsiderá e tim di mas fuerte dje World Series Kòrsou a pèrdè 9 pa 1. Kòrsou a rekuperá lihé dje derota ei ganando despues ku skor di 4 pa 2 di Mexico i asina pasa pa final dje kompetensia internashonal.
Den e final Kòrsou a sorprendé mundo kompleto ganando di Taiwan i tambe dje mihó picher di Little League World Series 2023 ku skor di 2 pa 0. Asina Kòrsou a konkistá pa di dos aña konsekutivo e titulo di kampion internashonal i pasa pa e gran final.
E tim representando region West di Merka a sali hinka 2 kareda den promé inen pa bai ariba 2 pa 0. Despues ku niun dje timnan no a skor den di dos inen, Kòrsou a kòrta e ventaha hinkando 1 kareda den di tres turno na bate.
Den bòm dje mesun tres inen sinembargo e tim merikano a skor 2 kareda i despues 1 kareda den su di kuater turno pa bai 5 pa 1 ariba. Kòrsou sinembargo no a entregá i den di sinku inen di forma dramátiko via di un grandslam di Nasir El-Ossaïs ta bin bèk den wega: 5-5.
Despues Ku Kòrsou no a skor den di seis inen, e tim merikano sí a hasi esaki den bòm dje turno aki. Tabata via di un homerun pa asina esaki gana di chiripa di e kampion internashonal pa asina konkistá e titulo máksimo dje Little League World Series 2023.
Picture taken by:Rachel Moore Photography LLC