FC Securitas Antias ta sigui ketu bai invikto den divishon B di CurFutsal. E tim a gana ayera, djaweps 30 di mei 2018, ku skor konvinsente di FC Five Stars: 5-2. Jean-Louis Fortin a tuma 3 dje golnan na su enkargo.
Federashon CurFutsal a kontinuá ayera den sala kubrí Niels Liberia di Stadion Odulio Willems na Suffisant ku weganan den divishon B.
FC Securitas Antias ta sigui komandá e tabla di posishon den e divishon, despues di a triunfá riba FC Five Stars. Na sosiego e skor tabata 1-1. Jean-Louis Fortin a hinka 3 dje 5 golnan pa Securitas. Awor e tin 19 gol anotá. Ela tèrminá e kampionato aña pasá ku 24 gol.
E sobrá golnan di FC Securitas Antias a keda di skor pa Rayno Inecia i Curven Statie. E 2 golnan di FC Five Stars a keda anotá pa Erickson Girigorie i Shannon La Crus.
Den e otro enkuentro den divishon B e tim di FC Celestia Boys a superá FC Bandolino ku skor di 4-1. E golnan dje ekipo ganadó a keda anotá pa Norwin Angela (2), Hensley Bergonje i Luigi Gumbs. E goleadó pa Bandolino tabata Rienk Boskma.
E kompetensia di CurFutsal ta sigui otro siman ku klousura dje promé buelta riba djarason 6 di mei ku 2 wega den sala kubrí Niels Liberia di Stadion Odulio Willems. Den divishon A tin e enkuentro entre FC San Lucas i FC Babranis 01. Sí San Lucas gana e ta fortifiká su promé luga riba e tabla di posishon. Sí Babranis gana e tim ta aserká San Lucas te na 1 punto na di dos puesto.
Den divishon B ta hunga kontra di otro riba mesun djarason 6 di mei FC Bandolino i FC Babranis 02.
Riba djaweps 7 di mei e di dos buelta ta ranka sali ku 3 wega. Den divishon A tin riba programa FC RO Family vs FC Don Bosco. Den divishon B tin dos enkuentro: Dòmi vs FC Securitas Antias i FC Celestial Boys vs FC Ocean View Elite.